إنسانية

[ثامر الحمدان]

:

حاول تكون انسان روحك تسيرك
… وانك على انْسانيّتك قلبك يسير

وكل ما اصطدمت بشي ممكن يكسرك
… حاول تسوي من الزوايا دواوير

وإن مرتك ريح وخايف تطيرك
… تكفى تذكر انك انسان ما تطير

اللي يتغير منك ممكن يغيرك
… وتكون غير لشخص مع شخص لك غير

أقهرك بالله ليه روحي تسكرك
… وكل ما يلفك حزن طارت عصافير

روحك عبارة عن كثافة تبخرك
… صوتك يخف فكرتك كتله تصير

غلطة وجودك كان محد يعبرك
… دام الوجود أحيان يحتاج تبرير

لا صرت ما تقدر تعامل مع اكثرك
… صعبه تغرد خارج السرب يا طير

اصحاب مرو وانت محد يبررك
… يعني يجوز إن مالك بشي تأثير

شعرك مجرد شخص جالس يبذرك
… خايف تجمل روحك بصمتك الغير

نصف الكلام اللي تقوله : يطهرك
… يا قس هذا الروح حزني غدى دير

الناس ناموا وانت روحك تسهرك
… حاول تنام وقول أصبح على خير

🌹