روح الكتابة ..

[نوف مطير]

.
.
.
في ضيقتي تزهر حروفي بساتين
وتطفّي اللوعة بصدري واغنّي

روح الكتابة تنفث احزان عامين
داريتها بين الرجا والتمنّي

كتبت مابي من شعورٍ ببيتين
عرّا سكوتي وانهمر غيم ونّي

مع كل ذكرى تبرق وترعد العين
ياحزن كم لك سارق الضحك منّي

اصبحت فيّه قاسم القلب قسمين
ياواحد اختار الخفوق بـْ تأنّي

يحلّق الهاجس ويرسى بجرحين
واطق بابٍ للسهر لكن انّي

ماني وحيدة دام صدر الدواوين
ملجا جروح ويجلي الضيق عنّي

مامات بي طول انتظاري وللحين
دايم وبيبان الفرح عند ظنّي