..فاتنْة العقيق..

[عودة نزال]

[POEM="font="Simplified Arabic,5,black,normal,normal" bkcolor="white" bkimage="./images/backgrounds/41.gif" border="ridge,4,black" type=1 line=0 align=center use=sp num="0,black""]
الهنوف اللي سكنـت حـي العقيـق =هـزت الطايـف وعاثـت بالبريـه
جادل ٍ تخضـع لهـا قمـة طويـق=وتبكي منها كـل عيـن ٍ عنجهيـه
لا مشت يزهر بها وجـه الطريـق=ولا اوقفت قال الثرى ظلـي عليـه
ولا حكت أيووووه يالفكـر العميـق=ولا اسكتت لبيه يـا ابلـغ منطقيـه
فكري اكتب لي صدى صرخة عشيق=وانثر اعجـاز الحـروف الابجديـه
دامني محبوبهـا واقـرب صديـق=وهي تمثل كل نبـض الارض ليـه
غن حلاوتها علـى اللحـن الرقيـق=واكشـف المستـور والنيـه مطيـه
واوصـف اللقيـا وتخيـر يارفيـق=اللي في جدة او اللـي ف الحويـه .
وادري انـك لأول ملاقـى شفيـق=جده ... النظـره الدمـار الأوليـه
شفتها وتمْتمْت بإحسـاس الغريـق:=ياترى هالصـوره هـاذي واقعيـه
حسنها الطاغي اخو الموت الشقيـق=واللي مومصـدق يتابعنـي شويـه
مبسمٍ يجلـي متاهـة كـل ضيـق=ثلج نابع مـن جمـر والنـار حيـه
وريقها مضرب مثل ماهو بـريـق=طاح سوقك يالعسـل ويـا الخليـه
لو درى عنه النحل خلـى الرحيـق=وجمع اسرابه على فم البنيه
وعينها: مجرم قضى عمره طليـق=وفـي سهامـه عنفوانـك يالمنيـه
رمشها لحالـه مشكـل لـه فريـق=مهدف بقلبي مـن الطعنـات ميـه
وصدرها : رمان يانـع لـه بريـق=مالي ٍ عيني قبـل يملـى يديـه !!
حلـو شوفـه بالزفيـر وبالشهيـق=لاغدن هاك الثمر حمـر ونديـه !!
وردفها: رمل ٍ طغى بوادي سحيـق=نابي ٍ ماقـد خلـق بالكـون زيـه
هـو يطيـق اللمـس ولا مايطيـق=علمينـي يالكفـوف المستحـيّـه !!
لا نظرتـه جـت شياطينـي تويـق=وغير اقـرأ آيـة الكرسـي عليـه
الوكاد اني بهـا اشعلـت الحريـق=وعودهـا ذاب ابيـدي هالمزهريـه
وجيت ابهدي قلبها اجمـل مايليـق=حرف يشطب حرف قيس العامريـه
وش بوصف من جديد ومن عتيـق=ثامن السبع العجايـب آ ه هيّـه !! .
كل صوت ٍ غيرها صراخ وزعيـق=خص لاقالت لي : (هيا) بـدلعنيـه
ارتفع للغيـم.. وبالمعنـى الدقيـق=والله اخرج عن نطـاق الجاذبيـه !!
حبها ياهو بحـر .. ياهـو مضيـق=فيني ومني .. كذا .. مني وفيـه !!
ان سكرت بحبهـا جعلـي مافيـق=هالغـزال النـافـره الاريحـيـه!!
بيننـا حبـل الوفـا جـدا وثـيـق=لاعصا جـلاد و لادمعـة ضحيـه
لو نغيب شوي مو بـس نستضيـق=إلا يهدينا الحـزن قلبـه هديـه !!
وشفني ماشـي يمهـا الله لا يعيـق=والوعد قلـب الديـار الطايفيـه !!
اختصـارا" حبهـا فعـلا" عريـق=مـن عراقـة اصلهـا هالادميـه!!
بس فيهـا عيـب فاتنْـة العقيـق :=اسمها ( تقوى ) وهي ماهي تقيه !!!


................. عوده نزال = ..........................[/POEM]

 

[ماجد صخنان العنزي]

هلا وغلا


شاعر جميل


شاعر عذب


الله ياعوده لك ولقلمك ووجدانك وحشه



اخوك ماجد

 

[محمد الضويحي]

عوده نزال .... مساء الوله

نص متدفق

دمت متألقاً

مودتي وتقديري

 

[نـــجد]

فاتنة العقـيق
قصيدة فاتنة


عوده نزال
لـك أبعاد أهلا وسـهلا

 

[حمد الظفيري]

.
.
.
.

عــودة أهلا بِك وسهـلا ً .. يا عزيزي

صح بوحك ...

تصدِق .... !؟






ودي أشوف هالهنوف

 

[محسن الشاهر]

ابـــــــــــــــــــــــــــــــــــــــداع يا عوده

روعه

خيال

صور

تسلسل جذاب

اسرتني بهالفاتنه يا عوده نزال


عوده اسمحلي بالعودة للارتواء بهالفاتنه

طبعا انت لك الهنوف فاتنة العقيق وحنا لنا الهنوف فاتنة القصيد

اختصارا" حبها فعلا" عريق
من عراقة اصلها هالادميه!!

بس فيها عيب فاتنْة العقيق :
اسمها ( تقوى ) وهي ماهي تقيه !!!

أكيد يا عوده لو انها تقيه ما كان قرينا اللي قريناه

صح لسانك مليون يا مبدع

متابعتي

 

[نواف التركي]

عوده النزال

أهلاً بك في أبعاد في هذه المشاركه الأولى , فاتنة العقيق أستحقت هذه القصيده رغم أنها تقى بلا تقى .


صح قلبك

و

دمت بخير

 

[ريم علي]

حضورك رائع
وقصيدتك كانت غارفة بالابداع
دمت بخير