أجنحة وأغاني

[مشعل فايح]

كم مرة ناديتك بصمتي من الخوف
يوم الزمن جرّد رماحه وشمّر
ناديت لك:عطني من حروفك حروف
ارمي بها الأخرس.. عشان يتذمّر
رديت لي وبصمت خايف وملهوف:
اخاف تنفيك ان تكلمت .. شمّر

[مشعل فايح]

لو لمست الدمع بارد
لا تسافر للذهول.
كل ما في العمر شارد
لو نقول اللي نقول

الرماد
اللي على اطراف الشبابيك العتيقة
والجراد.. اللي امتلت فيه الحقول
علّموني ليه كنّا في الحقيقة
خلف أبواب الزمان..
نحسد الفلاح صبره
ونحصد انضوب الموارد

ولا فتحنا الباب ليلة..
نلقى لوحة معلقة بباب الحديقة
البداية.. كل شي مجهول فيها
والنهاية.. آخر المجهول
وأحنا...
بينها عصف.. وذبول

[مشعل فايح]

يا جرحه الفتّاك.. يا هيه.. ما اوجعك
وطبيبك اعمى وعايشٍ وسط ظلمه
افزعني.. اللي منّه اليوم يفزعك
زولٍ بثوب.. اقرب من خطاه حلمه
وقت الرخا.. يقسم ويطرح ويجمعك
ووقت الوغى.. يزين له فيك سِلمه
بعض الحريم (رجال) بالفعل تقنعك
وبعض الرجال (انثى) بطبعه وسَلمه

[مشعل فايح]

وشلون ابنساه.. ما دام المحاني وشوم
وشلون ابسلاه.. واحساسي بدونه خلي
لو يدري الغيم بعده وش جرى للكروم
ما طاوع الريح واقفى بالمطر منجلي

[مشعل فايح]

حشرجات التيه ... في صدر الليالي
أمنياتٍ بين.. ممكن.. مستحيلة
وان تسائل.. عن سبب هالتيه سالي
ردت الأيام... للذكرى الجميلة
شمس.. غابت من عمروالجوف خالي
والظلام.... يكفّن الروح القتيلة

[مشعل فايح]

تشكي يا مقرود الزمن لي بويلاه
تبكي من الأعوام لجروح الأعوام
اشكي لربك.. قول يا الله يا الله
يمكن يطيب الجرح وتهون الألام
وان ما شفى اصبر على حرقة الآه
اسكت.. وطقّ براسك جدار الأيام

[مشعل فايح]

اصدق الصمت.. قدام الحبيب
واكذب الصوت.. صوت الأمنيات
وأجمل الوقت.. لحظات المغيب
واوفى الأيام.. هو يوم الممات
لا تضايق.. فديتك يالصحيب
ما نموت.. وبنا تالي حياة

[مشعل فايح]

قصقص جناح الطير.. لا طال ريشه
نصيحة المحروق.. لا يكفخ الطير
ما دام جرحك جرح.. ماهي بعيشه
وما دام موتك موت.. ما يفيد تصبير
واللي حيا كالطود حتى بطيشه
يا يموت موتة طود.. يا يسكن فبير