لملمة شتات !

[سلطان العتيبي]

شاريك لاتسأل عن أسرار / شاريك = ان قلت لك شاريك , لاتقول في كم ؟
لو الغلا له شيك والله لا اوريك = ابكتبه ( مفتوح ) والحبر بالدم

[سلطان العتيبي]

من لايعدك ربح لاصرت شاريه
لا لا تعده راس مال بيمينك

[سلطان العتيبي]

قالت : مساء الشوق , وصحت بي الشوق = رحّب بها بأعذب عبارات الاشواق
خذني معك بالشوق ياذوق بالذوق = علمني الاشواق في كل الاذواق

[سلطان العتيبي]

http://up4.m5zn.com/9bjndthcm6y53q1w0kvpz47xgs82rf/2009/9/8/07/707x27qrs.jpg (http://games.m5zn.com/)

مهما توديك الظنون البعيدة =إلا الحقيقة واضحة كنها الشمس
تعالي اقريني قصيدة جديدة =واستنطقيها تسمعين الصدى همس
حروفها تعطيك / جملة مفيدة=( الشعر في غيرك / رمسْه الغلا رمس )
تأكدي إنك ب / قلبي وحيدة= أكثر من آصابع يدك / إنها خمس
وان الغلا ل / بكرة وبعده يزيده=اليوم , وامس , وبذرة الحب / قبل أمس

[سلطان العتيبي]

اليوم هذا مختلف
لاتسألي عن اختلافه
ماينوصف

حتى ولو انك بعيد
وابعد من البعيد
اليوم حسيتك قبالي
وشميت انفاسك

خلك بعيد
وقلبك قريب
مايهمني مادمت اشوف
القرب قرب ٍ بالقلوب

والا المسافات
لو أبعدت تعجز توقف نبضتين
وحدة هنا
وحدة هنااااااااااااااااااااااااك

[سلطان العتيبي]

قالت مساء الورد !
ولا درت إني دريت
بقدومها
مان ريحة الورد
جت قبلها

هي مصدر الورد
والريحة اللي قبلها
مرسوها
جت تكشف الدرب

أميرة الورد
فيك المسا وردي

[سلطان العتيبي]

كتبت حرفين
وسميتها بالخربشه
قالت ترى حلو الكلام
اللي يجي بالارتجال
وانك تعبر فيه
عن اي شي داخلك
قلت اسمحي لي
الخربشه
ماصارت احلى شعر اكتبه
الا لانه فيك

تدرين يامعنى الشعر
لو يوم
تسكرت كل الدروب
وكل المعاني للشعر
غابت
عن البال
عندي عصا موسى
استحضرك
واخلق بك اروع ماكتبت
من المعاني

تصوري
أكتب سطر
وامسح سطر
وارجع واعيد
نفس الذي مسحت
من حيرتي
كيف اكتب اجمل مايكون
والقى بك الحل
لانني

بكتب / ......

واحلى المعاني


تولدت من اسمك اللي
علمني اسرار ......
يا.......

[سلطان العتيبي]

ساعة زمن
قضيتها
كني لحالي
في عين منهو شافني
وانا بعيد عن مجلسي
لني معك
في كل فكري
تدرين كيف اعبر ؟
اتخيلك
وانتي على الكي بورد
وتكتبين
ماهوب لي ؟
واتخيلك لوتضحكين
والبسمه اللي تنرسم على شفاك
من شاركك فيها
االا انا !!
واتخيل ان لك شغتلتين
عنهم تاخرتي
لني معك !
هنا احس اني مهم
هنا احس اني كبير
واني ملك

[سلطان العتيبي]

ان قلت شيٍ يعارض عقلك الراقي !=خذني على كبر عقلي به وحاسبني
وان زاد شوقي وقمت الخبط اوراقي=خذني على قد قلبي / لاتعاتبني !!

[سلطان العتيبي]

حتى الخطايا تعتبرها قناعات !=يوم انت ماتدري بحجم الخطايا
همست لك في غفلة الناس بسكات=أدرأ بنفسي عن شمات البرايا
واصبحت منك وفيك بيدين شمّات=عقب ادّعيت إنك قريت النوايا !
الجور ذنب ٍ من هَلَ الجور يقتات=تدري به إن ضاقت عليك الزوايا

[سلطان العتيبي]

أنا cuote وطحت في عربجية=متمرمطٍ مابينها وبين الاشواق
يخفق لها قلبي والاشواق حية=وقْليبها ساهي ولا هوب خفاق
ابدا الرومنسية وتقلب عليّه=ماباقي الا شوي وتعطيني طراق
وان قلت ويش السالفة يابنية=قالت كلامك كله حواق بحواق
يبدو لي انْها تسكن الصالحية=وإلا ربوّة شايبٍ راعي نياق


:D

[سلطان العتيبي]

البارحة ملامح السعادة = مرسومةٍ في ريشة الدكتورة
ماكنت ادور للفرح ميعاده = وهو يدورني على ابهى صوره
لقاني وغير مسير العادة = من يوم ماشميت ريح زهوره

[سلطان العتيبي]

لا لا تقولين
اكتب قصيدة لاجلي
انا اكتبك
لاجل القصيدة

ولو كتبتك لاجلها
راحت تماري فيك
كل القصايد

[سلطان العتيبي]

وين انت ؟
ماشفتك
ماتدري ان اليوم لو راح ماشفتك
ما اعده من ايامي !

تعال لاينقص بعمري يوم

[سلطان العتيبي]

ياغايبة
خلف السنيين
كثرت ظنوني بالزمن
انه خذك مني
جيتي بعد مارحتي
ومعك حنين

ياللغرابة بالزمان
أثره أمين؟ !

[سلطان العتيبي]

والله لا محشش ولا نيب سكران
لو شفت خطمات المجانين مني

تلقى جنون الشعر في بعض الاحيان
يعطيك نبذة عن جنوني وفني

لاتنخدع بي لو تطربك الالحان
ماهوب من دافع طرب يوم اغني

واحيان تطري كلمتين ٍ لها اوزان
ويرقص على راسي ثلاثين جني

[سلطان العتيبي]

ماهي غريبة عقب موقفك النبيل = ماقلت لك شكرا ولا قلت العفو !
ماهو ردا مني / ولكنه دليل = اني تعوّدتك كذا / وانك كفو
تبقى لحالك بالبشر مالك مثيل !!=لو حاولوا يمشون دربك ماعْرفوا
تقدر تقول انه سهل او مستحيل !!=عنه البشر(( طيب وردا )) تخلفوا !!

[سلطان العتيبي]

قالت وقدرأيتها
بعد الغياب
:
مازالت الأرض تدور !
وها أنا ألقاك
مرة أخرى !
في غير ذياك المكان !
فقلت
:
الحمدلله الذي أوحى إليها
بأن تدور
وأن تكون حبلى
بذلك اللقاء
يا أجمل الدورات للأرض

[سلطان العتيبي]

يامعمر القذافي= مالك وماللثورة؟
لبست ثوب ٍ ضافي = ولا ستر لك عورة

[سلطان العتيبي]

يامعمر القذافي=مالك وما للثورة؟
لبست ثوب ٍ ضافي=ولاستر لك عورة
صحا الزمان الغافي=عن لعبة ٍ مستورة
ذاك السراج الطافي=اليوم شعشع نوره
ماعاد يخفى خافي=على محيط الكورة
مااقولها بارجافي=كل العرب مخطورة
ياربنا ياكافي=ماندري منهو دوره !

[سلطان العتيبي]

كأنما غدا
أعيشه الآن
لأن فيه موعدا
ما اجمل الدقائق التي تزفني
اليه
كأنما حديثها لبعضها
أمانة
فحافظي عليه !

[سلطان العتيبي]

انتي لحالك
مالك شبيه ,, بين النساء

يكبر بكـ الصغير
ويصغر بكـ الكبير

تدرين وشلون؟
:
أما الصغير
يركض به الزمن ليا شافكـ
وتكبر فطرته
كنه تبرا من براءته
ويشوف بعيون الرجال
يشوفكـ أنثى

وأما الكبير
تدرين عن اذاك الكبير ؟
يوم انكسر به كبريااااااء
لقى حنانكـ له وطن
رجع به الزمان ولا درا
انه طفل

[سلطان العتيبي]

أنا رسمته على إنه أعذب أحلامي = اثر الزمن راسمه لي اسرع حلومي
وشلون أغير زمان ب / لمسة ابهامي= وأنا يغير مزاجي ليلي ويومي !

[سلطان العتيبي]

تدرين وش معنى تجين ؟=يعني تجي سعادتي
ترضين والا تزعلين=حاكيت بك وسادتي
علمتها السر الدفين=علمتها قرادتي
اني بدرب العاشقين=مشيت دون ارادتي

[سلطان العتيبي]

افرح ليا جا طاري الشوق واشتقت = حتى ولو حاولت في دفع الاشواق
وشعاد ياجرح الزمن لوتعمقت = تفداك روح اللي جرحته والاعماق
ابيك جرح مايدامل مع الوقت = لاهدهده وقتي عصى وقتي وفاق
اما كذا والا ترى ماتحققت = من المشاعر بين صادق وبواق
انا اللي افرح وابتسم لاتضايقت = ياذالزمن خبرت فرحة لمن ضاق ؟
ان كان به مثلي ف أنا فيك صادقت = على أصدق الحب وعلى بيض الاوراق
وان كان مامرك - وفي حالتي ضقت = افتح لنا صفحة ( مجانين عشاق )

[سلطان العتيبي]

ياضيعة اللي فوق جنحان الأحلام=يطير .. لكن ماتعدى مكانه
يسابق الدنيا .. سنينه بالايام=وهو مقيّد في ثواني زمانه
ركب الحصان اللي بلا سرج ولجام=يامن خبر فارس بدبرة حصانه؟!!
يبني مشاريعه خيالات رسام= عجز الورق لايحتوي ترجمانه
عنده تفاصيله مثل روس الاقلام=كل مانتهى من شان جدد بشانه !!
اليا تذكر وش تغير عن العام=ماحصّل إلا مايزيد امتحانه
يشوف ( ناسٍ عقبه ) اليوم قدام=والساعه الساعه .. وعشره ثمانه
أحلام . ماتحتاج تفسير الأحلام=ولا لها في كل تفسير خانه

[سلطان العتيبي]

الغالية لو تنطق الشعر مكسور = ماكنها إلا من حلاها تغنيه
تكسر بيوت وكنها تبني قصور= وإن قيل لي ياهيه طربان ؟ , قلت ايه
لو رددت بيت ٍ بلا إحساس وشعور=تولدت بين الشفايا معانيه
أقولها بالحق ماقلتها زور = واللي يقول مزورة وش يدرّيه ؟
عن حال عصفورة تغني لعصفور =ماله وللعصفور واللي تناجيه
يالغالية عليك ماقلت مقصور = ماهو كثير ٍ بين غالي وغاليه
دام الغلا مايعترف بأي دستور = ماهو بكسر الشعر يحتاج تنويه

[سلطان العتيبي]

سحايب الشوق بارقها جهر عيني=مدري مطرها علي ,, والا يتعداني !
ان امطرت عندي وسالت مياديني = أخاف من شربة ٍ تجرح لي لساني
زود الظما مايخيرني عناويني = عقب السحاب الذي يبرق ولا اسقاني
يالصامت اللي على صمتك تناديني= انا ادري انك مثل ما اقراك تقراني
ان كان من شربة ً لا بد ترويني = والا بليا ابتلي دربك وتبلاني
يومي توارى خجل من شرهة سنيني = كبرت عن دور( سليته وسلاني )!
ان كان قلبك قبل عينك يراعيني = مستذكرٍ يوم حاكيته وحاكاني
والا بلا وجه ٍ آخر به يلاقيني = خل آخر العلم / خليته وخلاني

[سلطان العتيبي]

ابحسن النيه ولا اقول كذاب=في نيتي واحسانها بك تحيرت
منك االردا يفتح على مثلك ابواب =واسكر البيبان لامن تذكرت
لو لحظةٍ خَذْنا من الليل جلباب =اسررت لي فيها وانا مثلك اسررت
ليما دفا ليل الشتا البارد وذاب= وانت متدثر به وانا به تدثرت !!!
مانتب صغيرٍ باللعابيب لعاب=كبير لكن عن سنينك تصاغرت
انا بثوبٍ واحد وانتٍ بثياب =كم ليلةٍ شقْتك وباكر تغيرت ؟
كم مرة فقدتني باقصر غياب؟ =واحيان حاضر لو انادي تعذرت !
كم جيت لك باصغر مشاريه الاحباب؟ = وان ضقت به قلت : النهاية . وقررت !
وليا جْمَعتنا في بعض ساعة حساب=كذّبت كل اللي تقوله وحوّرت
ترد وتعارض بالاسباب الاسباب=منها على نفسك بنفسك تكورت
ياصغيّر ٍ تجهل متاهات الاعجاب=النفس خداعة ترى ماتصدرت
ترى السهم يارامي الليل ماصاب=أنا بغير الصورة اللي تصورت
آخر بطولاتك بعد كنت مرتاب != انك بتكذيب الحقيقة تطورت
أحسنت بك نيّة ولا قلت كذاب = لكن لذاك اللي وفا لك تنكرت !

[سلطان العتيبي]

حكم العمر وإنه ثمان وثلاثين=يغرّني ولا رضيت انكساري
واليا انكسرت وغورقت دمعة العين= اردها قبل يهون اعتباري
الا غيابك تختلف به موازين=ينهار لاجله عنفوان اقتداري
غبتي وكانت هقوتي لو تغيبين=إني وكالعادة اضاحك نهاري
غبتي وعادت بي لك الحاجة سنين=ماعشتها كالذكريات اختياري
ماكن عمري وقتها غير عامين= نفس الوله والشوق ,, نفس العباري
مهما كبرت ابقى ( جنينك ) وتبقين = نهر الحنان اللي على الدوم جاري
يمّه ترى ضاقت جميع الميادين=مجلاسي , ونفسي , وعيني , وداري
متى تجين ؟ , اقولها / طفل مسكين=ابختصر في صمت طول انتظاري
في دمعة ٍ تطيح وانتي تشوفين = خليني اكبر يوم اشوف انكساري

[سلطان العتيبي]

تعالي
أجيبك ِ قبل السؤالِ
( أأنت سعيد ؟ٌ )

رأيت ُ مناماً عجيبا ً !
بأن المنام َ
أتى في المنام !

بدأت الحديث :
على اي شيء ٍ
توشحت ثوبا ً من الكبرياء ؟
الست َ خيالاً
بفكر جنون ؟
وفيك الحقيقة / حصد ُ هواء !
تباهى /
لأني خَلقتُ مُحالا ً
رسمت ُ به بسمةَ الأشقياء !

ذكرتُ شقائي ..
فراهنتُهُ ..
قلت : هل تستطيعُ
بأن ............ !!
فامطرت الأرض ُ
واعشوشبت كالرياضِ السماء ُ
فصااااااااح :
خسرت َ الرهانَ ,, خسرت َ الرهان !

رويداً رويداً
فليس مرادي !
ف / هلّا تريني حبيبي ؟؟ !!
بثوب ٍ يليق ُ بما بيننا
فكان سريعا ً ..
هروب ُ المنام !
وبتُّ سعيدا ً
لأني
كسبتُ الرهان !

فتلك حدود السعادة
عندي
حقيقتها .. انكسار !
ورغم انكساري
سأفرح ُ
أنك أصعب ُ من كل شيء
وأكبر من كل شيء
وحتى المنام
وأحزنُ
لأنك أبعدُ عن كل شيء
وحتى المنام

[سلطان العتيبي]

حدثي الليل ولكن
قبل هذا
اقرأي فيه الملامح !
فحديثٌ بعد صمت ٍ متعالي
ليس هدراً لاختلافات الليالي ..!

اقرأيهِ ..!
إن بدا الليل مخيفاً
أو وميضاً .. أو وحيفاً
فاتركيه ِ..!
ليس ليلَ العاشقين..!

إنما انتِ
مزيج ٌ
من هدوء ٍ .. وفراسة
ودهاء ٍ .. وسياسة..!
فاسرقيه ِ ..!

اسرقي الليل سكونا ً
وهدوءًا ..
كهدوء الحب في عينيك
كابتساماتك تستلقي على حقل ٍ من الكرْز نديّا

حين يرخي كلُّ نجم ٍ عينه ..
حين يستسلم للسائل من غير شعور
ذاك ليل ُ العاشقين
فاسأليه َ ..!

حينها سوف يبوح الليل عن أسراره
عن حكايا العاشقين
كم تناجوا .. وأعادوا ..!
ثم عادوا .. فاستزادوا ..!

حدّثيه ِ ..!
كيف كنت ِ؟
وانا ؟
والاغاني ؟
والحنين ؟
وبقايا العطر / إحساساً وذكرا ؟
وبراءات العتاب ؟
عندما ترخي عن المكنون سترا ..!
كيف ذابت كالسراب ؟
وكثيرٌ .. وكثيرٌ

أكثريه القول ..َ عنا
لِمَ قلنا .. فسكتنا ؟
ثم عدنا
حيثما نحن بدأنا !

لن يطيق الليل صبراً .. فاسمعيهِ ..!
سيقول الليل : عشقاً .. حدّثيهِ ..!
لن يقول الليل : صمتاً .. عذّبيه ِ ..!

ثم ماذا ؟
لست ادري ..!
ربما
ستظلين صبية !
ربما
للأحاديث بقية ! http://msa6el.mbc.net/vb/images/smilies/hrt.gif

[سلطان العتيبي]

آخر المشوار حاير والرجوع مصيبة=والتعب يفرض علي مواصلة مشواري
ابتديته درب ٍ أبيض مابقلبي ريبة=كني بطيب العواقب بالنهاية .. داري
وإن جبرني وقتي إلا الليل غصب أسري به=اتهادى ما اسري الا ليلة ٍ قمّاري
القمر شفته بعيني غاب قبل مغيبه=والصباح بعيد ماهو حروة ٍ للساري
ياجناب الله من ليل ٍ غدر بصحيبه=لابس س ثوب الخوي مْن الحمية عاري !
واقعي / وين التفتّ يشابه التغريبة = مايكذبها ولو ماصدّق بْها قاري !
أول المشوار جيته بالرضا والطيبة=وآخره يفرض علي الاتجاه اجباري
اختلف طعم السعادة عقب طول الغيبة=مابقى الا ابرز ملامح درعها التذكاري !

[سلطان العتيبي]

على اضعف اوتار عودي يعزف الحانه=الحان ماتطرب إلا / نفس مخدوعة


وقت السعة ينتحل حلاوة لسانه=وتضيع لاجيت أدورها من طبوعه
انسى الخطا باعتبار ان الزمن خانه=واسامحه ,, وآخذه في سكة رجوعه
ويعدني مجرم ٍ بيدين سجانه=شتان مابين مشروعي ومشروعه
أشوف من جيّتي / تقدير ٍ لشانه=ويشوف من جيّته / مارية خضوعه
نقصاني ب/زودي ,, وزوده ب / نقصانه=هذا هو احساسه الغريب من نوعه !!
يامن يلمح له إنه تاه عنوانه=ويعلمه وين كوعه , وين كرسوعه
وإني لو اواخذه باسباب هجرانه=شرياني أقوى ( على الصدة ) من ضلوعه !
قبل يموت الرجا واملّ ميدانه=ويكسّر حسابه ,, ويشوف مجموعه
ويخالفه عقرب الساعة ب / حسبانه=لاشاف يومي عليه أطول من اسبوعه !

[سلطان العتيبي]

آخر دقيقة عشتها بين عامين=مودعٍ عامٍ ومستقبل ٍ عام
حسب الدقيقة جور تستعرض سنين=بين أكبر الآمال وكبار الآلام
كن السنين مخالفة للقوانين=حسب السنة دفتر وروزنامة أيام
آلامها مستعمراتٍ ميادين=وإلا الأمل مازاد عن كونه احلام !
وحسب الحزن عشت العمر فيه عمرين=حال اليتيم اللي حمل هم الايتام
وحسب الفرح مازارني غير يومين=ويحكم ( غيابياٍ ) سببها بالاعدام
ياذا السنين إن كان باقي لكن دين=ترى الربا مْحرم بتشريع الاسلام
وان كان أخذتيها ملاقاة خصمين=ترجّل الفارس بلا درع وحزام !
العمر ولى وانقضى منه ثلثين=ماعاد باقي شيٍ أرجيه قدام
فيك الشعر / واحطها بين قوسين=( مهما وزنته مايغنى بالانغام )

[سلطان العتيبي]

كم نلتقي في صمت وتروح واروح=ماقلت لي شيٍّ ولا قلت لك شي
وانته على ذا الصمت تسمع صدى البوح=وتتجاهله كنّك تقول اصبر شوي
واخشى نهاية صبري بْداية جروح=أكبر من إن نْهاية علاجها الكي !!
كان القسا لك فيه غاية ومصلوح=ذللت لك عقلي على سكة الغي
واجيك عشق ٍ _ يرخص القلب _ بجموح=مثل حلال الشايب بدبرة صْبَي
مشاعرٍ تعدّت القلب للروح=تمكنت والامر ماعاد بيْدَي
اصغر حقوقك (( يابعد كل مملوح )) = واكبر طموحي (( كوني بخاطرك حي )) !!

[سلطان العتيبي]

مدري من السلطان بيني وبينه=لكن عشنا في بعضنا سلاطين
اثنيننا شعب ٍ سكن في مدينة = حتى ملينا الكون بعيون الاثنين
حتى الزمن يوم اختصرنا سنينه = ماكلفتنا خفقة ٍ بين قلبين
ماقام يرفع لي شراع السفينه = لكن رفة قلب ٍ اهدى من العين
ياذا الجنون اللي عليك السكينه = متفردٍ حتى ب / سلم المجانين
خذني جنون يجنن مفسرينه=جنون مايخضع لقلب الموازين
خذني جنون ٍ صار قبله حنينه=خذني ترى مليت كل الميادين
كل اختصارات اللحون الحزينه= توي عرفت الحب وينه وانا وين

[سلطان العتيبي]

ارخصت له قلبي وذروة غرامه=والشعرة اللي بالشرايين شابت
وعرقٍ نبض له بالغلا واحتدامه=من قلت أ ح ب ك : بالمعاليق نابت
اسرفت له بالحب .. كني غمامة = ظنيتها تمطر بخصب المنابت
يااااخيبتي يوم الحصاد ( الندامة )=بالعشرة اللي ويش ودت وجابت
شحت علي اقول : درب السلامة !!=كني ذنوبٍ للمشاعر .. وتابت !
للصاحب اللي شح حتى بكلامه !!= نية .. من اول صابت .. اليوم خابت !
هب الهوا ( عاصف ) وطيّر لثامه= ومن الهوا يبين معنى الثوابت
أنا ليا جنبت درب الملامة= من الردا بعض العقول استعابت
ان كانها وصلت حدود الكرامة=اعلنتها صرخة (( ترى النفس طابت )

[سلطان العتيبي]

عرفت ليه الجفا ماحرّك شْعورها = وليه استوى عندها بغْيابي حْضوري
أدوار وأدوار .. لكن دورها دورها= لعبت دوري .. ولكنّ انتهى دوري !
متذبذبة ترجع تغير بدستورها = والمشكلة عندها بالعاشق ( الصوري )
لها علي ( بالغلا ) لا امشي على شورها = ولي عليها تعرْف حدود دستوري
وإن كان دوس الكرامة يشبع غْرورها = أنا اشهد ان الهوى ماهو بمقدوري !
مادامني بالهوى عرفت منظورها = رسالتي ( من يعلمها بمنظوري ؟ )
( مدينة الحب ) لاصار الوفا سورها = يظهر بها فارس الاحلام الاسطوري !
وان كانها بالسياسة زادت قصورها = من السياسة تشرد ( عزت الدوري )

[سلطان العتيبي]

عذابك اعذب من دلال الغنادير= وعندك خبر .. مع ذلك تدور رضاي
ياكبرك بعيني .. بعد كل تقصير = مني بحقك شلت همي وبلواي
توي دريت اني ببعض المشاوير = مغمض عيوني ولا احسّب إخطاي !
وانك تراعيني مثل طفلٍ صغير = ترعاه عين امه وهو رايح وجاي !
تستاهل آقول انك مْن البشر غير = بك راحتي وبراحتي غيضة اعداي
الله يقدرني على اقل تقدير = لو ماقدرت ارضيك . يرضيك ممشاي
همسة ..! ترفق يتبع الشر للخير = أخشى يزيد الحب ويقطّع أحشاي