وسْعي عباتك!

[رضا الهاشمي]

خارَتْ قُوى قلْبي وْ تهاوتْ منْ عزومي أقْنعة
حتّى انْكشفْ ضعْفي أمام الحسْن و الزّين الفظيع

يا الرّايعة يا المبْهرة يا السّاحرة يا المبْدعة
في رسْم كحْل العين حول اللّيل و الصّبْح الدّليع

يالله منْ زينكْ و يا ما اجْمل حلاك وْ ما ارْوعه
يا الطّاغية في طلّتكْ يا فايقة حسْن الجميع

منْ صارع اجْنود العيون..اجْنود عينك تصْرعه
وايْخرّ منْ ناظَرْ طرَفْ عينكْ على عشْقكْ صريع

كيف أمْنع الشّفْتين منْ بوس الشّفاه الممْتعة
وكيف أقْطف الرّوز الحَمَرْ والفلّ منْ خدّ الربيع

وكيف أقْطع الرّمان منْ صدْر الصّباح وْ أجْمعه
وكيف ألْعب بْثلْج الثّنايا البيض و أرْتَعْ في الصّقيع

يا امْحوّطةْ قلْبي بْهواها بالجهات الأرْبعة
واللّي ألاقيني بْليالي عينها كلْما أضيع

أهْوى جمالك يا العشيقة النّادرة يا المُولعة
وآسوم رُوحي بسّ لكْ.. ولْغير حبّك ما أبيع

يا منْ على عرْش المحاني بالغلا متْربّعة
واللّي شراييني وْ عروق القلْب تسْمعْك وْ تطيع

حاجبْك لا ظلّلْ على أرْض الحشا..لا ترْفعه
لامنْ رفعْتهْ..صار مثْل السّيف..وامْبونهْ رفيع

منْ زود حبّي والهوى حسّيت بأنّكْ مرْضعة
وإنّ الخفوق اللّي تعلّقْ في صدِرْ حبّك..رضيع

بسْتان صدْركْ يا الغلا مرْبى هواي وْ مرْتعه
خلّيه يلْعب بهْ مثِلْ ما يلْعب الطّفْل الوّديع

واتْسافر اعْيوني بْجمالكْ والغرام الأمْتعة
وفي عالمِكْ ياليت وقْت الحبّ ما يمْضي سريع

وسْعي عَبَاتكْ...كمْ مرّة قلْت...جنْزكْ..وسّعه
آغار لو شافتك..عين الرّيح..فإلْبَسْ لكْ وسيع