أوراق فاتها قطار النشر و للتوّ تنشر

[عبدالعزيز رشيد]

عندما نجد الـ همّ حبرا

,
,

بسم الـ إله اللي خلقني
بسم ربي اللي رزقني
ابتدي يمه
وارسل لك رساله
ترسم الحاله
انا يمه
بنعمه .. لو انا بوحده
انا يمه .. انا
مرزوق .. او مخنوق
اسمي دوم هو مرزوق ..
آه يمه
اذكرني شايل منك وصايا
من عيونك من كلامك
من حبيت ومن مشيت
ومن عرفت ان البشوت السود
نورن يلثمه عفة بياض موشحه
ذيك الوصايا باقيه ..
فيها بقايا
ذيك الوصايا
راسخه وسط الحنايا
بسّ يايمه تعبت احمل سكوتي
وشاقني اشواقي لصوتي ..
فاسمحيلي ابتدي بهذا الكلام المنتثر
"
تعبت اجامل صورتي
تعبت اداري حالتي
تعبت من الوهم والمجتمع
ذيـك الصور .. ذيك البراويز
الغريبه والعجيبه
والكريهه
غرفتن سكانها اواهام وخديعه
شفتهم وسط الكذب
واعرفتهم وسط الكبر
اذناب اوهام العمر

ياكم اردد وقتها :

يالله من دنيا خذتنـا تعابير
...........يوم ارسمتنا في وجيه السفاهه
ياوجهنا الغلطان صرنا مخاسير
........صدق الوجه وسط الملامح متاهه


يمه
شهاده قلتها ....
ذولا
هلايم
..............أو
بهايم
..............أو
عدايم
آه يـــمه
أو ..
أقول ...
استغفر الله العظيم ..



توّني لقيت لها ظرف وطابع

 

[عبدالعزيز رشيد]

للتوّ أتذكّرها

,
,

أنا وأنتي
تعايشنا على اعشاش المنى
وفي البال ذكرى قرى الفلّ
واليوم الشوق قرنفل يلهبنا
تميل الأعشاب تلاعبنا
يسيل الندى علينا يداعبنا
كأنها والفراشات معا تباركنا
الليل عنوان رسمة رسمتها
قلتي : أين النجوم
فقلت : ضاعت
قلتي : كيف ضاعت
قلت: نور القمر أغرق النجوم في بحر الظلام
فقالت : ماأقسى القمر !!!
اما والله
ماقلتها بنفسي
رغم انني اجزم بذلك
وكل جرح مني قالها
ياحبيبتي كم انت قاسيه
فأين
أنت .. أين أنت ..
كأنكِ بعد ان قلتي ماقلتي
ارغمت نفسك على القسوه
لأن القمر كذلك مثلك
فعودي إليّ
لأن القمر يعووووود
ولو بعد حين

 

[عبدالعزيز رشيد]

رد رقم [3] للتوّ حذفته !

 

[عبدالعزيز رشيد]

أيضا للتوّ أتذكّر ماكتبت هنا

,
,


عند
مشرق الحبّ
كانت هنالك
قرى الفلّ
التي عشناها
واليوم هذا
قرنفل الشوق يشعلنا .. !
كانت سلال الياسمين
من يمين الشرفة
ترقبنا
اليوم صار الصبّار
بالشرفة الأخرى
يرقبنا ..
أيّ
ورد عيشٍ نعمناه
وأيّ شقاء صبرٍ
مللناه !
عند مغرب الحبّ
ليت
الشتاء أخذنا
معطفا له ..
وليت
الشمس أخذتنا
ظلا لها ..
لكن
حبّك قد أخذنا
أرجوحة لطيشه !
.
.
فقر
بنا
فأقرا فقرات حزننا
تجد
بين السطور سرّنا ..
فلا أخفيك بأننا إلى الآن
لانعرف سرّ فقرنا !!!
هكذا كان
المنظر العام
لحبّنا !

 

[عبدالعزيز رشيد]

تذكّرت وتذكّرت لييين انكبّ الـ حبر عَلَي !



ياواهني ياطاري اللعب والطيش
.......................ايام انا طفـلٍ بوجهي بشاشه
ايّام اناشيطان جمع المحاريش
......................جاهل رمى عقله وما به خراشه
يومي افتّـش بالمعاتيب تفتيش
.....................من عاتبه صدّه وبيّن دفاشه
يومي اشوف ان الشقى احسن العيش
.....................درسٍ وتطبيقه علوم ودباشــه !!
هبّت علينا مثل جمع المطـاريش
.....................من ماضي الايام يبغى انتعاشه
يسرد ملاماته وقول اشويش بشويش
...................فزّيت كنّي المنتفـظ من رشاشه
ياكم نسيته \ طايرٍ ناسي الريش
....................ناسيه مثل الزيف ميّت نقاشه
ويـلاه يا ايّامٍ تبدّت مراهيـش
.................لين امطرت والشوق زاد ارتعاشه
صدق الكبر خلا الاماني معاطيش
................صرنا السواقي والاماني عطاشه
واذكر عذاب الشوق وضحك الدناديش
................وَدفتـر الاشعار ينثر حشاشــه
واليـوم انا ناسي ولاعـــاد منّيش
........... ماغير ذكرى الطيش وعصفور عاشه
عصفـور له في خاطر القلب تنقيش
................يازين ايّامه وزين انتفاشه
قم يا "حمد" و ارسم سمانا مراويش
................"يابو حمد" وانته عليك الفراشه!!

 

[عبدالعزيز رشيد]

أجهضها الـ تردد كثيرا حول شيء ما


أذكر
وبذكر ..
صورتي أو رسمتي ..
طير ٍ وتايه بالسما
طيرٍ هجوسه انتما
والطير طار وطار
لكن مالقى له أي غصن ......!
ياكم حلم ..
ياكم تمنّى له غصن
يرسي على فاله
وظلّ اوراقه الرطبه
وعطر ازهاره السمحه
ويتمايل بأطرافه !!
على هونه ! وكلّه خوف يجرح في شعوره ..
زي ّ طفلٍ يلعب برفقه مع العابه
مثل خلّ يساير خاطر اصحابه
وبرجع لجل اقول
انّه حلم
يعني وهم
يعني ألم
يعني أماني ..!
في خيالي
ترسم احلامي !!!!

شفت الكذب
ضيفٍ لفانا لابس الستره
ومتنكّر
وانا شفته ... وهدّدته ..
ولكن كنت في صغري
وصار الصادق الواعد ..!
وصرت الكاذب الغادر ..!
وتنمو شعلة الثوّار .. في ثاري ..
وأثاريني ,.. ثرى .. !!
من يوم صغري !!
وقيل شوفوا الثاء عيبٍ في الصبي !!

يالحبّ دايم خابرك
.........تحبّ تزوير الكلام
بسّ اعترفلك آخرك
........كذبه وأوّلك الهيــام

دوّر
ودوّر لوتدوّر
ماتلاقي مثل اخلاصي لأوهامك تبيع !!!

 

[عبدالعزيز رشيد]

كانت لـ سطّام ومرّت سنه وأكثر وماشفت سطّام
قديمة تتجدّد بذكراه
,


سطّام عمرٍ راح للتيه مسروح
ـــــــ روّح وحنـّا مـن رداه نتصـافى
لاتجرح الأسماع ياصادق الروح
ـــــ والوقت جرّحنا فكيـف انتشافـى
هذا الردى نفسه .. وماينفع البوح
ـــــ نكذب على انفسنا نقول انتعـافى
ننصح وتطري بالذهن سالفة نوح
ـــــ وتطري سوالف روّحت بارض يافا
صوت النصيحه هالزمن صار مبحوح
ــــــ خلّك على حدّ الردى انّا نتلافا
صدري وصدرك يالخوي صار مشروح
ـــــ مادامنا نمشي وحنّا نتوافى
وجدي على الي مالشقى صار منطوح
ــــــ متروك بالدنيا وحيد مْجافى
شف لبس هالدنيا صار مفضوح
ـــــــ محدن بهالدنيا سليمِ مْـعافـى

 

[عبدالعزيز رشيد]

كثيرا فرحت بكتابتها وكثيرا كنت سأفرح بنشرها إلا أن اخوتها منعوها من النشر
,



دخيلك ياجمل احلامــــــــي أبي شوفه
..............دخيلك .. أو ابــــــــي كلمــــه تعزّيني
اساير دربك الجافــــــي مع ظْـــــروفه
.............وكن الدرب دربي يــــــــــوم يشقينــي
اشوفه يبتعد عني مع طْيـــوفـــــــــــه
...............ومن شوقي اشوف البعد بعدينـــــــي
انادي بْصوتــــي اللـي يجمع طروفه
..............يقول الصـــــوت تكفـــى لاتخلّينــــي
يبيني الصوت امشي واكتم حروفــه
..............اثاري الصوت يتمنّى يخـــاوينــــــي
يبشّرني : دروب الشـــوق مرصوفه
................وشوقي دليـــــــلٍ صــــار يهدينـــي
على هذا الأمل والنفـــس ملهوفــــه
............اتابع خطوتي والطيـــــــف حـــاديني
تعبت امشي وكنّ النفـــــس مكلوفــه
...............واذاني وْقفت شفت الشوق يخطيني
غروبٍ تتبعه شمس تبي تّشـوفـــــه
...............ودرب خافـــــيٍ ضيّـــع عناوينــــي
غريبٍ يطلب اوطانـــه وبه خوفـــه
...............اثاري الشــوق طمّاعٍ عثــى فينـــي
ويوم وْصلــت له جيت اربت كْتوفه
................واذا صوتٍ ينـــــــادي : لا تخلّيني
لقيت الواقع المنســـي ومـن جوفه
.................يمدّ الصوت : تكفى لا تجافـيني !!