تصفيد شياطين!

[محمد علي العمري]

مع كل الحب لأبعاد أدبية.. ولأفئدة الشعر التي تهوي إليها..



البارحة فـ ايسر قفص صدري مثل وخز الخلال

.................................................. تافه.. ولكنه قدر يـ سـ رق لذيذ غفايتي

كنه يعدد لي على اصابع يميني والشمال

........................................... حسناتي اللي ما تجي قطرة فـ بحر غوايتي

ومع أني اللي لا غزا يطعن ويظفر بالجدال

............................................... حنيت ظهري للندم لين استقامت غايتي

والحين ما باقي على شهر الصيام إلا ليال

.............................................. يالله عساها اللي بقى بيني وبين هدايتي

وإن كان ما ربي هداني قبلها والذنب طال

........................................... يصير شعبان القصير أطول فصول حكايتي

تعبت اشيل من الذنوب جبال وكتوفي هيال

........................................ ومليت في ضحكة غرام ارضي غرور هوايتي

كتبت.. لا والله كذبت.. وما دخل جيبي ريال

............................................... والحين انبت.. وبسم ربي جيت أعيد بدايتي

للروح دربٍ ما يطول بها ولا يعطي مجال

.................................................. مسافة أقصر من نظر عيني لفجر نهايتي

لا يالندامة كان جف العمر والميعاد سال

.................................................. وأنا ما اخذت من السجود اللي يليق كفايتي



....!