معرفة تقهر ...!

[محمد بن شتير]

صباح الخير ..مساء الخير
كل عام وانتم بخير ،، تمنيت مصافحتكم بما هو أجمل





وش اولة وقتي وش اخرته
و العمر ما يكبر و لا يصغر ..!

على ثلاثيني و حاصرته
واقف من الصدمة عجزت أكبر ..!

لو لان رأس الوقت قبلته
يمكن على قلبي يحن أكثر ..!

لعيون همي لا تحملته
و الضحكة اللي لونها أصفر ..!

أسمع " صباح الخير " ما شفته
و الليل ما يغري عشان أسهر .. !

يجيب عكس اللي توقعته
و اللي عرفته منه يتغير ..!

لمين ؟ قلبي يشتكي وقته
من ناس لا جوهر و لا مظهر ..!

كم واحدن يقسى و لاطفته
و مقصدي بالطيب يتاثر ..!

وكم واحدن لامن حكى عفته
و بالخطا و المعصيه يفخر ..!

وكم واحدن فالناس معرفته
ب ابسط عبارة (معرفة تقهر) ..!

تشوف كل الناس مشغلته
و يفرح بكل انسان يتعثر ..!

اللي بعيني كل ما شلته
يطيح من عيني و يتكسر ..!

ما بين منزالي و منزلته
أعيش في وقتي عشان أصبر ..!

اوقات أقول الناس مشكلته
و اوقات أقول ان الزمان أقشر ..!


للجميع مودتي