نَافِذه !

[سعيد الموسى]

كل شي يمر ..
اعرفه!
هذي ريح ..
وذي مباني!
والبعيد هناك ..
ظلّ!
ذا رصيف ..
وهذا نخل!
والشوارع - والاضاءه
والوجيه اللي تكرر !
كلهم في هالمدينه :
يركضون : بنص صدري !
بنت
عالممشى الحزين !
هرولت فوق السنين !
كنّي أسمعها : حكت !
وشوشت ثم ضحكت ..
ثم مرّت ..
وسقطت !
قامت تسب الرصيف !
يلعن " أمك "
يالعنيف !
وش كثر مزحك
" سخيف "
__

التفّت لهالشوارع ..
والبشر
هاللي تصارع !
واللي أمضى : للمضارع !
وش كثر هالكون فارع !
درت وجهي ..
بعض وجهي !
وافتح ايديني .. واطالع !
هالخطوط
وهالحدود !
اللي تومئ بالوجود ..
رغم أني
" حافظ أيدي "
بس ادوّر عن وريدي !
عن حياه ..
بهالحياه !
وابتسامه للكآبه ..
واقتل الفكر بْرتابه !
قاطع الفكره
طفل !
عمو .. لو تسمح
أبجلس !
قلت يابابا .. تفضل !
قال تدرس ؟
قلت هذا الكون - قاعه !
كل ليلة أحضر أدرس !
قال : طيب ممكن اسأل ؟
قلت يابابا .. تفضّل !
قال من عامين .. بابا
سافر الحد الجنوبي !
مارجع للحين .. تدري ؟
ماحضر حفلة نجاحي !
كل مااسأل .. صرت أجهل !
وينها الجنه ؟
بعيده !
لن ماما كلّ مااسأل ..
قالت أنه راح فوق
يم هالغيمه .. البعيده !
في مكان يقولوا : جنّه !
بس انا .. والله فقدته !
اه لو يرجع .. حضنته !
عمو تكفى ..
بس قلّي .. وينها الجنه ؟
بعيده ؟
عندي رقمه .. تتصل به !؟
قول وينك .. عندي عمّار ويبيك !
كل ليله يحتريك !
قول زعلان .. ورضى
قول : ناقصه اصدقا
قلّه محمد ضربني !
قله مساعد جرحني !
قول عمي قبل مدّه !
كسّر أغراضي وكسرني !
آه يابابا ... تعبت !
قمت قاطعته ..
حضنته !
طاحت دموعي ..
وسكّت !
___