طرح انسان فوضوي

[عادل الدوسري]

احبائي
كما اسلفت لكم موضوعي هذا اسميته "طرح فوضوي"
وانا قصدت ذلك بالذات وسيرى القارئ
ان ما اكتبه هو فوضى عارمة في فوضى عارمة
وما اضمنه ان شاء المولى انها فوضى انبثقت من احداث حقيقية اما عشتها او عايشتها
فيها جرأة كبيرة ربما لن ترتقي لذائقة البعض
فيها خروج مروع عن المألوف لكن ان شاء الله فيها نقلة نوعية
فإن اصبت فمن الله وان اخطأت فمن نفسي والشيطان
لكن أوعدوني ان لا تحكموا على هذه الفوضى من اول طرح....فاصبروا بارك الله فيكم وتحملوا ولو على مضض اول الطرح

الفوضى الاولى

تحملوا سالفتي هذه يالربع
ابفترض ان اللي في بالي حبيبة
وابفترض اني اصلا لقيت وحدة احبها وتحبني
كلها افتراضات
المهم بقول لها
حذاري تحبني وحدة
انا ان حبيت وحدة اعشقها بجنون......اتعبها.....ارهقها.....استنزفها
ابيها تكون كل من يهمني في دنيتي
ابيها بنت عمي.....صديقتي....زوجتي.....حبيبتي
والاهم عشيقتي......اعشقها بجنون وتعشقني بجنون....واحبها بتجدد....تحبني بتجدد
ماتمل.....مو كل حزة تقول لي تعبت اقدم عشق.....مليت اعطي حب
هذا مايمشي وياي


ابيها كذا
خل الوصل يمسح مذاريف العيون الذارفه
و يعزز اركان القلوب اللي شجنها مستديم

أبيها حتى وهي جنبي تحسسني بشوق
وهي اللي من زود حسنها متواضعة

واذا شفتها اقول لها

يا فايق التوصيف يا زين ٍ عجزت أوصّــفه
يا ديمة ٍ يمطر غلاها لوّ ما في الجو غيم

وابيها تسقيني من ينابيع الهوى بدلوها كل يوم....هكذا

دونك ينابيع الهوى و الدلو بيدك و أغرفه
وإليا أرتويت إسق النديم اللي ورد عـدّ النديم

وانا طبعي اناني
ابيها ان جيت حطتني على الراس من فوق
لا ارضى منها الاعتذار من تقديم كل العشق لي
او تدليلي......حشا اللي يقول انا توم كروز

ماعلينا توم كروز او غيره

المهم ماتعتذر عن تقديم الحب والعشق
واذا اعتذرت ترى بقول لها

لا تعتذر والعذر يا سيد الغلا وين أصرفه ؟
وأنا على جال الرجى خـلّــتـني أشواقي مقيم

ابيها مخلوق لكن غير عن كل مخلوق
ابيها مصيبة ولكن ياحلوها من مصيبة

وفوق كل هذا وذاك

ما اقبل بالصدف او ان تأتي كما تأتي
ولا ارضى بانصاف الجمال

مانيب من ياتي على صدفه و يمكن تصدفه
اما دسَم وإلا سمَح من مَــدّة الكف الكريم

ابيها في كل حاجه عجيبه
واذا بغت تجيب راسي تجيبه

الزبدة ابيها تكون هنوف كل هذا فيها واكثر
والشاهد ابيها في منتهى الرقة....في منتهى الذوق

ماقلت لكم حذاري تحبني وحدة
هذا اذا اصلا في وحدة رضت تحبني
فوضوي انا مو صح....
مغرور انا مو صح....
اناني انا مو صح....
والاهم من هذا وذاك
متفلسف وخيالي اسبح في وهم لوحدي
مو صح....

ولنا عودة

ملحوظة:ابيات هذا الطرح من قصيدتي "الهنوف المترفه"

::
::
ورزقي على الله