إحساس يــ غ ــمر الأنفـاس

[رزان العتيبي]

من أوراقي القديمة


غفى جرحي وقلت أصحى يجوز المحَكْ واجي لك
ـــــ مدام الجرح بي نايم طلبتك قول وش جالك

سؤالٍ حيّر الضحكة بعيني شفني ابكي لك
ـــــ وأنا صعبٍ عليّ ابكي لغير اطياف ترحالك

تغَطْىَ الجرح بلحافك صرخ يافلان بشكي لك
ـــــ تعبت أزيّف افراحي أقول إن القهر هالك

تعبت ارقص على جروحي ولك طيري يغني لك
ـــــ يزيّف لك شعوري بك يموت بلحظة اهمالك

ياعمرٍ كان يعنيلي كثير أشياء وأعني لك
ـــــ علامك ترتحل عنّي بعد ماكنت لك حالك *

أنا اذكر كنت لك أسهر يسامرني عَتَمْ ليلك
ـــــ يحاكيني وش تسوي إلى من غبت عن بالك

تتوه بخَطْوتِكْ حاير تناديني وأنادي لك
ـــــ تَشَكّى غيبتي عنّك وانا أشكي بُعد منزالك

تقول اني نبض قلبك بدوني موتك ايشيلك
ـــــ واسَمّي يابعد نبضي عسى موتي قبل فالك

أبعرف ليش متغيّر تنفّضني مناديلك
ـــــ وأنا اللي فيك مَ أصدق كلام وزور عذالك

انا جيتك بعد مانام جرحٍ كان يضوي لك
ـــــ ابسأل بس وش ذنبي وانا اللي لابسه شالك

ألملم دمعتك وأضيق إلى من ضاق بك حيلك
ـــــ ويفرح بك غلا قلبي اذا هو مهتني بالك

تعال وشيلني منّي تَعبت امشيك وامشي لك
ـــــ تعال وهدهد أشواقي وخذني عَتّم ظلالك

ذبلت ومابقى فيني سوى همسات شوقي لك
ـــــ ابغفى دامها ملّت تنادي جيّة وصالك




* حالك = ذاتك ..