مُـذَاكِــراتْ 24 سبتمبر ...

[تهاني سلطان]

.

صباحيّ كان الأجمل .. أجمل صباح مرّ علي بِـ هذا الترم .. خصوصاً أن حياتنا صايرة تُقدر بِـ الأترام السنويّة عشان الدراسة .. هذا الصباح عشت لحظات تمنيت أن قلبيّ يتعلق بها في الحقيقة ومايغادرها أبد ..


بابا ودانيّ للجامعة و رحت أختبرت القرآن نهائي .. للي يسألون كيف كان ..! كان حلو ماعليهِ .. أمممم .. أول شيء دشيت الديبراتمينت " القسم تبعنا " و قعدت أسأل دكتوراتي وكذا و ماسكه خط بالإنجلش .. شوي وحده مرت من عند القسم وشافتني .. قالت أنتِ اختبرتي قرآن .. قلت لها لا طبعا باقي بطلع لها .. قالت لحقي عليها لأن شكلها طالعة مستعجلة أو عندها شيء .. أنا أستأذنتهم وطلعت يمها .. وأنا مره خايفة أنو تكون راحت لأن اليوم آخر يوم لِـ التسميع .. لقيتها موجودة .. قالت لي وينتس .. قلت أنا كنت عند الديبراتمنت و آم سو سوري تأخرت عليك .. و أهي تسلك لي الموضوع .. يوم جت بتسمع لي و أبو الحركات اللي مالها سنع .. قالت لي أقرأي من الآيه "وقالوا كونوا هوداً أو نصارى .. " أكملي .. أنا عاد ببدأ الأية من أولها و أعيد المقطع اللي قالته وأقول بدال قالوا =كالوا .. و أهي تطالعني بنص عين و أرد أتعوذ من الشيطان و أقرأ صح .. يوم خلصت قالت ليه تتركون عربيتكم و تهتمون بِـ الغرب .. فجأه :| .. طيب أنا غلطت شنو فيها .. غلط لغوي .. ياستي كنت عند القسم وملتويّ لساني و دشيت عندك و قريت فيها شيء .. أحيان فيه ناس مادري وش يحسون به من جد .. المهم أنا كملت اللي علي و كذا وطلعت من الجامعة و ضايق خاطري بسبب كلامها ..


نرجع لبابا .. قلت لبابا أمسك طريق المطار .. فجأه :| .. و قام يطالعني زي اللي وش عندك بالضبط .. قالي ليه فيه أحد بالمطار ولا ناويتها سفر .. قلت لا موب كذا بس أبي طريق طويل .. قال وش رأيك بالشرقية .. قلت لا موب لهالدرجة عنديّ اختبارات .. المهم بابا توقع أنو بسويّ له مفاجأه وانو في أحد بيجي و كذا .. بس موب خابر في أحد عنده إجازة قريب .. المهم أن بابا يحللها يمين ويسار و ساكت طول الطريق .. بيفتح حكي قاليّ شنو رأيك بالجو ..! ..قلت ماشي حاله .. يوم وصلنا عند بوابة المطار و أشوف جامعتي الجديدة اللي قاعدين يزينونها على اليسار .. للأسف ماراح ألحق عليها .. لكن الصراحة مره شيء ..


المهم .. قلت له كمل لداخل .. وندخل إلى داخل المطار ... كان فيه لوحتين .. صالة المغادرة و صالة القدوم .. عاد أهو ينكت علي يقول وين تبين أي صالة .. قلت له صالة القدوم .. وقفني عند المطار و أهو راح يوقف السيارة بالمواقف و أدخل أنا المطار .. يالله مو قادرة أوصف شعوري بوقتها .. الناس و شنطتهم .. و المعتفسين و اللي حالتهم حالة .. و الناس اللي مرتبين وشيك و يطالع ساعته .. و الأطفال اللي وصلوا على أرض المطار و يلعبون مع بعضهم .. أو الطيراين و شنطهم الصغيرة و جوالاتهم اللي لها أيام مافتحوها .. أو المضيفات اللي يجون مجموعات أربعة وخمس ويا بعض و ألوان ملابسهم الفاتحة و المرتبه عليهم .. و أخذ لي كوفي و أجلس على واحد من الكراسي أطالع فيهم ..


شعور حلو أنك طالع الناس كذا ..و شعور بِـ الحنين لِـ ناس بجد تتمنى أنك تقابلهم وتحضن أيديهم .. يكفي بذاك الوقت أنك تتمنى أن بين هالناس الجاية شخص من اللي تعزهم و يحسون فيك .. كثير من الأشخاص مروا ببالي .. و قليل من الأشخاص اللي بجد تمنيتهم بذيك اللحظة و تمنيت لقياهم .. و كثير من الأشخاص اللي ودعتهم بِـ صالة و أستقبلتهم بالصالة اللي كنت أنا جالسة فيها ..


و أنت تطالع الموجودين تبدأ تدقق بِـ مشيتهم .. بِـ إتجاههم .. بِـ تحركاتهم .. تبدأ تشوف كيف يتعاملون وكيف يتصرفون .. تبدأ تطالع اللي بجنبك من اللي بصالة الإنتظار ومين ينتظرون أبوهم .. أمهم .. أخوهم .. أختهم .. صديق.. أو حتى حبيب فرقت بينهم وبينه المسافات ..


نص ساعة و أنا متيقنة أنيّ كنت في هدوء غير عن اللي يعيشه اللي حولي .. وكنت في فرح أكثر من اللي كانوا يعيشونه اللي حولي .. الهدوء لِـ أن ماتهمني الرحلات جت أو تأخرت و لا القادمين إذا كان هو بينهم أو لا .. و فرح لِـ أنيّ عرفت كيف أعيش بِـ ملامحهم في كل مره أجيّ للمطار و أكون مشغولة بِـ شنطتي و الجواز و موعد الرحلة ..

و بنص الساعة بعد تذكرت كل الأغاني اللي ترافق كلمة السفر و كنت بس أسمعها على الآي بود العزيز ..


إلا ياوقت


الأربعاء 10 06 2009 م

.

 

[تهاني سلطان]

.

في سؤالٍ عابر لِـ المُخيّلة .. أوجد الحديث ..

أنا -شنو تعني البراءة ..!
نفثّة -في هذي الأيام تعني السذاجة
أنا -وليه مازلنا نستخدمها
نفثّة -على أمل أنها تنوجد
أنا -مؤلم إننا نصرخ بها و نبتسم بقولتها و نتأمل بوجودها
نفثّة -هذي نهايتنا صرنا مشاعر متناقضة و فوضوية
أنا -حالتنا المأساوية هذي المُضحك المبكيّ
نفثّة -: )
أنا -حتى ابتسامتك بِـ مشاعر صامته
نفثّة -لإن الصمت هو أبلغ تعبير عن ما يحدث من براكين في الداخل
أنا -.
نفثّة -: )






هالوقت صار يفرض علينا أمور إحنا بصراحة في غنى عنها .. أمور من الأشياء اللي تجمل الحديث و تحاول تخلي لك قبول عند الآخر حتى لو كان الآخر مقتنع تماماً أنك "كذاب " بقولها و أنك مستحيل تستخدمها و أنت مقتنع فيها أو قاصد معناها الصريح .. بِـ هالحالة تكون أنت إنسان فارغ إلا من "الحكيّ " ..


الأشخاص اللي أتعامل معاهم سواءً بالجامعة أو الإجتماعات أو حتى بِـ المقابلات العائلية يكون فيها من الحكيّ اللي يخليك تنفجر بوجهه الواحد وتقوله أنت كذاب لكن لِـ معرفتك التامة أنك إنسان ماتختلف عنه و هذا إذا ماسرقت بعض كلماته عشان تستخدمها بِـ لقاء ثاني مع ناس غيرهـ و تكون جدير بِـ الإهتمام و تكون محفوظ بالذاكرة لِـ مدة أطول حتى اللقاء يجمعك فيهم ..


للأسف أحيان تُجبر تكون من هالنوع عشان تمشي مصالحك ومصالحه .. وهم عشان ماتكون إنسان رسمي ..غير مقبول .. شايف نفسك .. ومو عاجبك أحد .. يعني يا أنك تمدحنيّ أو أنا راح أذمك .. ويمكن بعد أنشر خبرك لِـ اللي حولي و أخليك إنسان "غير مهضوم " ..


هو صح هالحكيّ .. يرفع المعنويات .. ويخليك تحس أنك إنسان سبيشل و أنو مايضيع تعبك حتى لو كان هالشيء اللي قاعد تُعطى فيه كم كلمة تدفك لقدام لكان يظل الحكي الحلو حلو و أليّا زاد .. راح تستبثر اللي قدامك و راح تحس حالك ولا شيء ..



هالحكيّ واجد .. أضرب على سبيل المثال .. كلمة مشتهره عن البنات على وجه الخصوص.. كلمه من جد لو الوحده أحسها مو قاصدتها بمعناها أبي أحيان أقولها يابثرك يا آدميّة .. كلمة "ياحبي لك " و أليّا جت قالتها و أهي مادة حرف الباء بِـ الموضوع .. يالله .. و أحيان اللي يستخدمون هالكلمة بنات المصالح .. اللي يبون شيء تسويه لهم على المستعجل .. أو سويته وخلصتي وخذوهـ أهم .. يقولونها و يمشون .. و أحيان تلاقيهم يذمونك عند صاحباتك و يحاولون ياخذونك تريقة أنك إنسان تزين لهم شغلهم و كذا .. و المشكلة ماتتوقف هنا .. أحيان يقولون لصاحباتهم إذا بغيتوا شيء روحوا يمها تراها خدوم مره .. وعاد يتكاثرون عليك و كلهم نفس النمونه يستخدمون نفس العباره اللي أهي " ياحبي لك " ...


بالنسبة لي يأثر فيني هالحكيّ .. و يأثر بشدهـ .. لكن إليّا عرفت صاحبه .. و إليّا تأكدت من أن هالشخص يستخدم كلماته لي لأن بجد أنا أستحقها .. إلى درجة أحيان ما عاد أقدر أرد عليه .. تصير مشاعري أقوى من قوة دفع الكلمات و أفضل الصمت .. يمكن صمتيّ أو تعبيرات وجهي أو حتى نظراتي توصل له اللي أحس فيه .. أما إذا هالشخص أنا متأكده أنه يقولها لمجرد كلمه عالقة بلسانه .. أو متعود يحكيها على كل سالفة .. أو لمصلحة .. أو عشان يضرب يدي بيدهـ ويقولها .. هنا أفضل أن نظرتي تكون نظرة وحده لعيونه و بعدها ألتفت لأي مكان بعيد عنه وجودهـ .. لو كان هالمكان بخيالي .. المهم ماعاد أبيّن له أن هالكلمه ماحسيت بمشاعرها ..


الحكيّ يظل حكيّ .. يعطي الإنسان دافع .. لكن يظل حكي .. تأثيره ماله فايدة .. بكثر ماينعرف أن هالشخص ماعنده غير بيع حكيّ .. أتمنى .. وبجد أرد أتمنى .. ليت الكلمات اللي لها مكانها وموقفها تستخدم بموضعها .. ليت الكلمات اللي نقولها نحس بمعناها قبل لا نقولها .. نخالطها الإحساس عشان توصل لقلب الشخص الثاني .. قد أيش راح تقربه منك بكلمة بسيطه فيها الكثير من المشاعر .. و قد أيش راح تبني بداخله مدن من الحب و المشاعر تجاهك .. الحكيّ مخلوق .. يحس و يتكلم .. و أحيان يتبّلد شعوره بتبّلد صاحبه ويفضل أنه مايوصل إلاّ لِـ الهواء .. يزفرهـ من صاحبه و ينساهـ ..





الأثنين 15 06 2009م

.

 

[تهاني سلطان]

.

لمن أطالع أطفال الحين و أفكارهم و خيالهم و أتذكر طفولتنا و كيف كانت و كيف كان خياليّ في بعض الأشياء .. خصوصاً أنو فيه أشياء كثير بدت تتعدل مفاهيمها على ثاني متوسط و الثانوي .. و فيه أشياء إلى الحين و الله مادري شنو المقصد و لا عنديّ جرأة أسأل عنها .. لكن عيال هالجيل بجد "سوس" أحس لو بجد ضاقت عليّ بسألهم موب سأله أحد أكبر منيّ ..

من الأشياء اللي طرت ببالي .. يوم كُنا أيام الطفولة .. الأيام البرئية .. و التفكير اللي والله أبيض منه و أنقى مافيه .. أيام ما كنا ناخذ الحكيّ زي ماهو .. مانحاول نسأل ليه وكيف و متى .. ناخذه و عاد بطريقنا نصرفه .. نتخيّله أو نخليه بالواقع على هوانا .. الأهم مانرد نجادل أهلنا و لا نخليهم يتفلسفون علينا ..

عاد أنا موب من الجيل القديم مره .. أنا من الجيل اللي أحسه ضايع بجد .. الجيل الفاصل بين طفولة الأولاد و البنات سوا ... ولعب بالشارع .. وهالهبال .. و بين اللي الحين مقفل عليهم و فاصلين البزارين عن اللعب مع بعضهم .. هالجيل اللي مايدرون شنو يسوون وياهـ .. يخلونه عاديّ.. يطلع الشارع .. يزور عيال الجيران .. يلعب معاهم .. ولا يقفلون عليه .. عاد كل يوم الأهل طالعين بشغله .. و مسببين حالة تشتيت للشخصيه .. يعني أجيهم اليوم أقول بروح لجيرانا .. يقولون لا مافيه .. و أنا توني أمس كنت معاهم .. تغير في 24 ساعه بس .. عاد مثل ماذكرت قبل مانقدر نجادل .. خلاص التحليل منا وفينا ..

المهم موضوعي أهو ..
هليّ كانوا يقولون دايم .. لا تطلعين الشارع يسرقك " الحراميّ " .. لا تروحين لوحدك للمكان الفلانيّ ياكلك "الحراميّ " .. لا تجلسين هناك يطلع عليك "الحراميّ " .. أمس تقول أم فلانة أن فلانة لقاها "الحراميّ " و خذاها .. حركات أنو دامها موجودهـ تسمع و تفهم ماتطلع و المشكلة الأعظم أن فلانة اللي انسرقت على قولة أم فلانة مداومة معي بالمدرسة كيـــــف "بهالطول " ..!

كنت و الله أخذ هالحكيّ على محمل الجد .. يعني حتى لو تجرأت و رحت للمكان اللي قالوليّ ممنوع .. نبضات قلبي تتسارع من الخوف .. وأرجع بسرعه قبل هالحراميّ لا يطلع .. كانت الأماكن المُظلمه و اللي فيها هدوء مكان تواجد الحراميّ .. كنا مثلاً لمن نروح لحديقة أو شيء ما أتعدى الألعاب القريبة من أهليّ خوفاً من هالحراميّ ..

على فكرة أنا هالحراميّ راسمتة بِـ خيالي .. كنت أتخيلة شيء أسود وله ذيل وبيدهـ شوكة .. تأثير "والت ديزني " .. بعدين من سنة رابع ابتدائي عاد من طلع هالحراميّ براسي "المسيح الدجال " .. فجأه ..
و صرت أتخيل أن هالحراميّ أهو المسيح الدجال لمدة ثلاث سنوات يعني الإبتدائي كلها راسمة نفس الكاركتر للمسيح الدجال .. إلى درجة أنو لمن بدش أولى متوسط أقول لأهلي خلونا ننقل لمكه و لا المدينة و أهم يستغربون وشهوله تبي تنقل مادروا أن السالفه تخص الحراميّ اللي مخليني أتخيله حضرتهم ..


الحين خلوا أحد بـِ أولى متوسط يفكر زي هالتفكير .. مستحيل و ألف مستحيل .. عكس نقاوتنا البريئة .. و الله كنا حبايب ونسمع الكلام و يمسك معانا ألين ما نعقل و بعدها نعرف شنو المقصود و شنو الواقع الصح .. !
لو أقول لأحد من أطفالنا الأبرياء اللي الحين يا بابا لاتروح الشارع يسرقك الحرامي .. بيقعد يسأل عن مواصفاته .. وشنو يبي فيه أليا سرقه .. و إذا بيرجعه البيت أو لا .. طيب بشتري له حلاو أو لا .. بالأخير بيسوي اللي براسه و يطلع الشارع عشان يعرف وش هالحرامي .. و "شو من لحيّة" .. بس هيّك حب استكشاف و لقافة ..


والله بجد إلى الحين باقي خيال "الحراميّ " .. برأسي .. بس موب الحرامي اللي برابع ابتدائي لا الحراميّ مال الطفولة المُبكرة ...



الثلاثاء 30 06 2009م

.

 

[تهاني سلطان]

.

وهذهِ الإجازة و صلت .. و خلاص بدينا نضبط وضعنا لِـ استقبالها صح .. هاليومين اللي طافت حاولت أجيب كل الأشياء اللي ناقصتني عشان أبدأ أجهز شنطة السفر .. بترك الرياض لِـ مدة ثلاث شهور .. راح أشتاق لها كثير كثير .. و أهي تعرف أن هالشوق بكل سنة يكون متواجد بداخلي .. بس أضطر أتركها عشان رغبة هليّ ..

بهاليومين .. و أنا أشتري فيهم .. و أحاول أتأكد أن كل شيء أوكي .. و أن مافيه شيء ناقص .. إلاّ و أرد البيت و ألقى ناسيه شيء أو شيئين .. مشكلتي ماعرف أمسك ورقة و قلم و أكتب الأشياء الناقصة .. ما أعرف أفتح المذكرات اللي بالجوال و أكتب فيهم شغلاتي الضرورية .. حاولت أعدل من سلوكيّ "المميت " و للأسف مافيه فايدة ..

المشكلة على كثير الأسواق اللي بالرياض و فروع المحلات اللي فيها إلاّ أن يطلع الواحد بشوز و مايلقى عليها باق .. أو يطلع بِـ ببلوز و مايلقى عليها اكسسوار .. أكرهـ هالأيام بجد .. لأني من النوع اللي أقعد أليّن المناسبات أو زي هالأوقات فترة صيف أو شيء و أبدأ أشتري أغراضي مره وحده تقعد معي مثلاً ثلاث شهور أو أربعه و أبدأ استبدلها .. من الثلاثاء اللي طاف لقيت شوز أصفر قلت يالله باخذهـ على أنو ماأذكر فيه شيء يجي عليه .. بس عاد قلت بنبش بِـ أغراضي و ألقى .. بقى له باق يالله و أقعد ألف صحارى كله أختفى اللون الأصفر .. ماعاد فيه هاللون .. ولا من قبل يوم كنت أروح بس أتمشى .. ألقاهم بكل زاوية .. و يوم صرت أبيهم ماعاد ألقاهم .. مو قلت أكره السوق .. المهم أنا رحت الخميس لِـ غرناطة .. أنا ماأحب أشتري منه .. لا "أحبذه " كثير .. ما أدري أحس أماكنه صح فروع بس مو زي باقي الفروع مادري مالنا شغل .. المهم و أدش مع ماما مكان و أنا ناسيه سالفة هالشوز الأصفر .. و ألقى باق صغنونة تجنن لونها نفس لون الشوز .. قمت بوسط السوق أقول يالله يالله من الفرحه : ) .. يعني بجد لو نسينا أمر شيء نبيه بِـ "إلحاح " نلقاه ..


عموماً أنا مالي شغل ..

شنطتي باكر راح أرتبها .. وبحاول أمسك ورقة وقلم لو تنسى لي روحه ثانية .. و أكمل النواقص المعتادة .. عمّ أفكر بسالفة العيد و لبسة العيد لأن المنطقة اللي بروح لها بعيدة شوي عن المحلات و الأغراض .. بس مادري كيف الجو راح يكون فيها لأنه متقلب .. عسى الله يسهل هالروحة و يكتب فيها الخير .. و عسى نستانس بهالصيف و هالعيد .. مادري أحسه راح يكون جو آخر .. فيه بنات خالتي و كذا .. يعني شلة بنات و روحات و سهرات .. أخواتي بعد راح يحتمعون .. أخوي الكندي : ) راح يجي بعد للعيد .. يعني : ) .. دعواتكم يارب ..




السبت 04 07 2009 م

.

 

[تهاني سلطان]

.

و مُذكرة بِـ لون البياض بين أوراقيّ الخاصة ..
و يومٌ من الجنة كان هذا اليوم ..





الأربعاء 08 - 07 -2009 م

.

 

[تهاني سلطان]

.

هاللي حولك .. ماحد يحس فيك ..
و هاللي حولك .. يسألون شنو فيك ..
وهاللي حولك .. يتذمرون من تصرفك وياهم ..
و هاللي حولك .. يجبرك تسكت و تبتسم ..





البكاء الصامت .. هالحالة اللي صعب أنها تجي بوقت يكون هالوقت من الاوقات النادة اللي تصادفك .. و بهالوقت تحديداً يكون الكثير حولك .. يشاركونك الحديث .. و يحاولون يفهمونك أكثر .. هم بداخلهم فرحانين لأنهم و ياك .. و أنت بداخلك حزين لأنك صُدمت من ناس غيرهم .. ردة الفعل منك غير تجاههم .. حتى هم يبدأون يسألون نفسهم أخطينا بشيء .. قصرنا بِـ شيء .. و يحطون التقصير تقصيرهم و الذنب ذنبهم .. و أنت معاهم جسد و التفكير بعيد عنهم ..


البكاء الصامت أنك تحاول تبكي موب بِـ شكل داخليّ ... لا هالشيء تظهرهـ لكن بدون صوت .. بدون تنهيدهـ .. فقط دموع تشارك خدك .. وتحاول تقلل من اللي بخاطرك .. يمكن معاها تفضفض من ذاتك لِـ ذاتك .. يكون هالبكاء بعيد عن اللي حولك .. يكون بِـ وقت مافيه غيرك .. حتى لو كانت أنفاسهم تشاركك بِـ المكان .. مُتعب هالشيء .. لكن فايدته أنه يعيشك البُكاء الحقيقي ..


و هذا البُكاء .. مشكلته النَفَس لأن بنفس الوقت اللي تبكيّ فيه لازم تكون تتنفس طبيعي .. عشان ماحد يحس ..حتى بصوت نفسك .. يعني تكون تبكي من شيء و تحذر من شيء ثاني .. أحيان من قوة الألم اللي بداخلك .. تزفر زفرة تحس أن وياها العالم حس فيك .. تحس وياها أن العالم ينبض فيك .. ومن قوتها يمكن تتحول لِـ البكاء الحقيقي .. وهنا تكون انتقلت لِـ مشكلة أكبر لِـ أن صمتك ماراح يفيدك .. و لأنك راح تتكلم عن مشكلتك ..


يظل هالبكاء مراحل يمتد من البسيط اللي يكون وقتيّ وينتهي .. يمكن عشان تغير المكان .. ووجود ناس أكثر .. و زحمة و روحات وجيات .. و أحيان يكون ألم من روح لِـ روح و هالشيء مُدمر .. لأن مهما ظليّت مع البُكاء الصامت إلاّ و تنفجر بِـ ببكاء حقيقي يطهر قلبك .. و يهديّ أعصابك .. ويخليك تشوف الحياة صح .. و تشوف الأمور كما هي تماماً ..








الأربعاء 15 - 07 - 2009م

.

 

[تهاني سلطان]

.

كيف تعرف أنت من أي نوع من الشخصيات .. و كيف تقدر تحدد ذاتك وتصنفهَا ..!

أحيان أكتشف أن هالشيء تساؤل عظيم لكن بالأخير مو مهم .. الأهم تقبل الأطراف الثانية لك .. و لتعاملك معاهم ..
وكيف أنت .. قريب منهم .. بعيد عنهم .. تحاول تتقرب لهم حتى بتغيّر ظروفك .. يظل السؤال .. أنت قدمت لهم شيء يخليه ذكرى طيبة لك أو لا !

كثير من الأشخاص نعيشهم ونعيش معاهم .. نقاسهم كل شيء .. نهديهم أرواحنا .. نعطيهم قلوبنا .. نحاول نتواجد معاهم بِـ زين الوقت و شينه .. و أهم يبادلونا نفس الشيء .. يكونون ويانا روح .. و يكونون بقربنا جسد .. يحاولون قد مايقدرون يسعدونا .. و نحاول حنا بعد نرد لهم هالجمايل الكثيرة اللي يعطونا .. و فجأة و بعد مدة نكتشف صفة سيئة من هالصفات اللي فيهم .. تكون شيء مؤلم .. شيء يجرح اللي بداخلنا .. و يخلينا مصدومين فيهم .. مو مستوعبين اللي قدموه لنا من قبل .. و اللي أهم يعيشونه .. صفه كانوا ينبذونها .. و يعلقون بِـ النقد على اللي تكون فيه ..

صدمة ..!
تكتشف هالشيء فيهم .. و بالمقابل ماتقدر تنطق بِـ كلمة وحده .. تحاول تبيّن لهم أنهم غلطانين .. و أن هالأمر ماتوقعته منهم .. ماتدري بوقتها ليه مو قادر توقف بوجههم تعاتبهم .. أو حتى تعلّق بالنظر ..

و المُشكلة ..
يجون يحاولون يبينون أن الخطأ مو خطأهم .. و بوثوق تام .. يزيفون هالصفة اللي فيهم ..أو اللي تجددت معاهم .. رغم أنك أنت متأكد من اللي شفته .. أو حتى من اللي انجرحت منه .. و أهم يبينون لك العكس .. و أنت تحاول تستوعب من الصح هُم ولا أنتْ .. ذاتك اللي شافت هالشيء بعقلها و بمنطقها .. و لا ذاتهم اللي أجبرتك تعيش بكامل عواطفك صدق كلامهم ..

و تستمر معاهم .. و يتناسون الأمر .. لكن أنت ليه ماتنسى ..! .. ليه يبقى هالألم منهم محتّل داخلك .. مو كان الأمر بيّدك .. كنت تقدر تبيّن لهم أن هالصفة مؤلمة .. ليه تكابر على نفسك و ترميها وراك .. وليه أحيان تجيّ ببالك و أنت معاهم .. و أحيان كثير و أهم يشكون لك من مشكلة أو أمر متعبهم .. تقعد تطالع ملامحهم .. و تسرح مع اللي صار لك معاهم .. مع الصفة اللي اكتشفتها .. و أنت بذاتك ألغيتهَا ..


تظل صفاتنا مانقدر نحددها .. و لا نقدر نحددها مع الأطراف الثانية .. صعب تقتنع بهالصفات اللي رسمتها وتنصدم أن صاحبها يحمل صفات يفاجأك فيها بعد مدة تعارف طويلة .. و صعب تثق بـ أي شخص وتهديه الروح و القلب .. لأن هالشيء معناهـ أنك راح توقف في صراع دائم بين عقلك و قلبك .. لكن مو معناه أن فيه أشخاص كثير يستحقون .. لكن متى نقدر نحدد ..!.. أو بِـ سؤال أكثر دقة .. متى نقدر نقول أن هالصفة مانحبها و بالأخير ممكن نكتشف إننا نرفضها من غيرنا و تكون فينا بدون ماندري .. و فوق هالشيء نحلف و نأكد إننا مستحيل نسويّه ..!




الثلاثاء 28 - 07- 2009 م

.

 

[تهاني سلطان]

.

رمضَان .. الروحانيّة المُزروعة في قلوبنَا .. الروحانيّة اللي تخلينَا نحس بِـ أنفاس الله في كُل شيء حولنَا .. اللي تخلينَا نحس بِـ تفاصيل الأشياء و مُتعة وجودهَا .. و اللي تخلينَا نحس بِـ ذواتنَا و قُرب روحهَا إلى السماء السابعة .. التهنئة في رمضان من أجمل الأشياء اللي اعتدنا تواجدهَا .. أحس أن دخولنَا في رمضَان نعمة من الله .. هبة وهبها لنا في كُل سنه تصيد من رصيد عمرنَا ..

المُعانَاة في الصوم و خصوصاُ في أيامه الأولى .. الصداع و العَطش و أحياناُ عند البعض الجوع .. ميزة من المميزات التي لا نشعر بها إلا في رمضان .. الفقراء و حاجتهم إلى المأكل و المشرب و كأنه ينمو في أجسادنا يوم بعد يوم ..
قراءة القرآن و التلذذ بوجوده بين أيدينا .. و محاولة فهم معانيه و ختمه في هذا الشهر ..

صوت والديّ و أنيّ أصوم على صوت أذآنه بالفجر و أفطر بالمغرب همْ على أذآنه .. هذيّ أعتبرها من النعم .. أن العائلة كلها تكون حولك .. تحسسك بقوتهم و تمسكهم بِـ ببعض هذي بعد من النعم بهالشهر ..

لما يجيك كل شيء تشتيهيه على سفرة واحده من قهوة إلى الـ نهاية من أنواع الأكل و أنواع التمر .. هذي بحد ذاتهَا نعمة .. كل اللي تبيه قدامك .. وكل شيء تتمناه تحت طوعك ..

لما تقابل ربك بِـ صلاتك .. و تمسك بين يديك قرآنه .. تحس أنك عبد .. و أن فيك شيء له صله بربك .. توقف على حيلك .. تستخدم يدك .. تقرأ بعيونك .. هذي من نعم الله اللي مستحيل مايمر يوم ماتتذكرها و تشكرها عليه ..

أنك تنتظر تقابل اليوم الثاني من أيام رمضان .. و أنت مؤمن أن الله من شدة حبه لك .. و حبه للخير لأجلك .. راح يخليك تعيش اليوم الثاني بِـ أمل كبير أنك تكون عند حسن ظنه .. تعبده .. تحفظه بقلبك في كل حين .. تذكره بينك وبينك .. هذا الشيء دافع كبير أنك تجعله نعمه من نعم ربك .. و أنك تحمده وتشكره على كل يوم تعيشه بِـ أمل أنك راح تعيش اليوم اللي بعده و اللي بعده ..

أرجع و أقول الحمدلله الذي بلغنا رمضان .. و الله يجعلنا من الصوامين القوامين ..



الأحد 23-08-2009م

.