شبــَّاك الوجــــــــــــــــع

[عبدالعزيز العميري]

كم ليلةٍ مرعوب من نومتي قمْت
_____________ لليوم خايف يلحقك شيَّ كايد

ادريك عايش دام عن عشرتي رمْت
_____________وآنا اموت وْاعرفك مَا انْت عايد

خلّيتني محتار يوجَعْـنيِ الصمت
_____________ويوجع كثير اكتب إليك القصايد

 

[عبدالعزيز العميري]

(من فم الأبرة)

لمشاهدة القصيدة عبر الرابط التالي :



من عرفتك
رغم ضيق الوقت واكثر
في عيوني
كنتي اطهر
من كثير وجوه مرت من سنين
جيتي مع سرب النوارس
ادخلي : بعد السلام
ما على الشريان حارس
قبل اضيع
جيتي فرحه
من ينابيع الربيع
من تخوم بلاد من خلف الضباب
من زمن غير الزمان
هذي انتي
من بياض الغيم بنتي
مثل شمسٍ
تفتح الشباك وتفك الستاير!
افردي للصبح معقود الظفاير
كوني وجه الحظ يوم الحظ عاثر!

سولفي لي
عن ليالي التيه
عن نجمه تصلي من زمان
ما لقى الحادي بها وجه الطريق
سولفي لي
عن قلق عن ضيق
عن صحرا غدت ابره
عن نياق الحظ في الليل البهيم
علميني
من متى والنوق تسري
من فم الابره لفردوسٍ رحيم ?

عبدالعزيز العميري

 

[عبدالعزيز العميري]

مطعون من جرحك وتشعر بانهزام
____________ كلْ ما سكت وْصاح جرحك ما نسينا
يالراحلين اللي خذوا منا الكلام
_____________ لا ترجعوا… ردو حناجرنا إلينا !

 

[عبدالعزيز العميري]

انتظر
وآحسَّ ذا الشارع يجيبك
من صدى الجدران تطلع
مع وحيد يمر شارد
كلّ ما ذا الحزن يرجع
حيّ صوتك ما يموت
في الحواري
في دهاليز البيوت

 

[عبدالعزيز العميري]

ياليلي المظلم
__________كل الصحاب رماح
وش عاد ما يألم
____________حتى القصيد جراح

 

[عبدالعزيز العميري]

يا اناني في جراحك ما تبي جنبك أحد
__________كم حزنت وكم خذلك الناس ولحالك بقيت

 

[عبدالعزيز العميري]

تفتحي باب الجروح القديمه
___________ باكر تطيب ويندفن حب واسرار
يا مرخصتني للجفا دون قيمه
___________ ما به ترى للمرخص ظروف واعذار
لو هي على هالذكريات الأليمه
___________بيدي طويت اللي مضى كنّ ما صار

 

[عبدالعزيز العميري]

سقطت (لا) في الابيات السابقة:

لا تفتحي باب الجروح القديمه
___________ باكر تطيب ويندفن حب واسرار
يا مرخصتني للجفا دون قيمه
___________ ما به ترى للمرخص ظروف واعذار
لو هي على هالذكريات الأليمه
___________بيدي طويت اللي مضى كنّه ما صار