لوتدرين..-فراتية

[كريم العفيدلي]

لوتدرين..
.................


الى (ريما)ومدينة مصياف وربوعها الخضراء:


لوتدرين

جسمي من الدمع ذاب ورجع للطين

لاتبكين

لو تردين أقدملك هدية الخد والعينين

لوتدرين ...

ان احنا انخلقنا بروح موروحين

رحتي ..

وخذتي نص روحي وياك

وخليتيني بين البين

لانص روحي راحت حتى تتلقاك

ولا روحك اجتني وتطبق النصين

وأظل عايش مومثل هالناس

أخلص من صبر ..وأتلاقى

وي صبرين

ولوتدرين..

من تمرين .. ماي النهر

يسلم عالزرع ويبوس راس الطين

وأتحول نهر لجدامك من تمر

ولوبيدي أنقسم نهرين

بلكي بروحة..ردة..يضايقونك ناس

يزل جدمك بواحد تطيحين

واسألك ..

يهالبيك الناس حيرانين

هوالمي يغسل بيك ..والا انتي

التنزلين المي وتغسلين

واذا غفيتي على صدري بيوم

أفكر بيك..

أفكر بالمحاضن ..بالمشابك

زين..لا..موزين

شفافة وتصمم جسمك من الجام

واخاف ألمسك بيدي تنكسرين

ولو تدرين.................................



مصياف -أبوقبيس
30\07\2005م