~~ مـ ـطـ ـر .. وأشـــياء أخــرى ..! ~~

[عبدالله بن زنان]

.
.

.





روحي فيك .. يا معنى الأمل / ياقيمة اللي راح
وباقي لي بعض فوضى .. تزم الجرح باهدابي


أشوف الناس ماهي ناس / دونك ماعرفت ارتاح
ولا حسيت وش معنى الحياه / بزحمة أصحابي


وحيد من الفرح / مالي من الأحباب غير جراح
أتصفح / مواجع من مطر .. وآبلل ثيابي


غريب الما / يذوق الما .. "خيال" بحلمه الفضاح
وغيمة خاطره .. حزن الفقيد الموجع الرابي ...


... على حدب الضلوع أرسى مراكب مالها مفتاح
وضاع بزحمة الغربة .. وضعت بكامل اسرابي


طيور بلا فضا .. حطّت على بالي تقول / اشباح
وصرت أغصان في قصر الخريف / ودمعتي بابي


ألا ياروح من حبك ... ألا يا صبحي اللي طاح
أنت اللي سرقت الناس / وانت الناس واحبابي ..!





.
.

.

 

[عبدالله بن زنان]

.
.

.



الغصن غافي / وطير البرد " حال "
والفصول حمول / والدنيا .. تعب ..!


كل ما هبت رياح الوجد .. سال
كل مابي .. والبقا / زحمة عتب


أستخير الما .. واقول الغيم فال
واثر كل الغيم .. تلويحة صخب


ماهقيت من المطر .. ذل السؤال
ولا رجيت من الزمن مال وذهب


كل آمالي .. هدوء / وصبح بال
وكل أحلامي .. على ذاك المهب


أنتظاري يلبس ثياب .. الوصال
ولاحصل له / لا جماد ولا رجب


واقف لحاله .. على شهر الجدال
والسنين تمرّ .. واحواله عجب


الأمل يشرب من عروقي دلال
والعطش رواي حناياي بسبب


كل غيمه تسكن .. حدود الخيال
ما تصب الما / على راس التعب ..!




.
.

.

 

[عبدالله بن زنان]

.
.

.



ليل المدينة برد
وشموع في سله

هذي رياح النرد
تله ورى تله

والسيل ماهو فرد
أمطار منهله

يعني دخيل الورد
وش آخر العله

تعل لجل البرد
وجنون عبدالله ..!




.
.

.

 

[عبدالله بن زنان]

.
.

.




نصفي أمطار ورياح / ونصفي الثاني غلاك
وانت في كاس الحنايا .. في فراغ الإنتماء



شفت فيك الأمنيات / ولاشربت إلا جفاك
واحتميت بكل ممكن .. سور حلم بلا بناء



ياحبيب النبض ياللي / طرت وجناحي سماك
وين كونك من جنونك / والمقادير ابتلاء



علمّ عيوني تنام ... وعلّم الظلما ضياك
يكفي أن الشمس خدك / والتواضع كبرياء



لا مشيت آحس كلي / يمشي بخطوة رضاك
ولاقفت تشوف رسمي .. صارت اللوحة دماء



تدري انك بالعروق / وتدري ان السيل ماااك
وتدري جنون السحايب / نبض يتسمى بـ مااء



هاك عزف الما .. وعطني / مايخليني دفاك
يكفي انك كل مابي / وانت معنى الإنتـماء ...!





.
.

.

 

[عبدالله بن زنان]

.
.

.



لو زرعت العيد .. بـ عيون البشر
ما أشوف إلا أنت عيد / ولا سواك



أعتبرني عيد / مرة في العمر
وبـ اعتبرك العمر ..عيدي ياملاك




.
.

.

 

[عبدالله بن زنان]

.
.

.


تدري .. أغانينا فرح ..
وتدري عن القلب الكبير ..

تعااال .. كم عيد أنجرح ..؟
كم راح .. من لحظة عبير ؟

طيوري أمست في ترح
وآنا على بالي تطير ..

بس للحسافة / مابرح ..
.. طيرك / وطيري في هجير ..!




.
.

.

 

[عبدالله بن زنان]

.
.

.



علميني كيف أنام ..!!

علميني كيف أغطي الدمع

لافرفرف على صدري وسام ..!

علميني كيف أفارق هالوجع

وجناحي الفوضى ..

وليلي في زحام ..!


علميني كيف أعيش ؟؟

كيف أنسج من براد الليل ريش ؟؟؟

علميني كيف تغريد المطر

كيف السمر

كيف القلوب تعيد للدنيا أماني من وئام ؟؟

علميني كيف أعيش

كيف أطيش

كيف ألم الورد وايدينك سهام ؟؟

علميني كيف همس الليل

يتحول هديل من الحمام ؟؟

علميني كيف أمارس عطلة الأرواح

وبروحي خصام ؟

علميني كيف تدوين السهر

كيف القهر

يصنع من الدمعه لثام ؟؟


علميني

علميني

علميني ... كيف أموت ؟؟؟

.
.

.

 

[عبدالله بن زنان]

.
.

.



علمّ جسور الود .. وشلون صبري
دربي يضيق / ولا لمحت انفراجه


أعطيت / لين الليل عشش بصدري
ومثلك يخون النور / يطفي سراجه


أدري / بأنك تعرف اليوم قدري
لكن وش اللي صار بعد المواجه؟


شفتك غريب .. وغربتي فيك قبري
ولقيت فيك الورد .. ذابل حجاجه


لو عشت مهما عشت / مافاح عطري
وعطر المحبة / في بحر / في زجاجه


خلك على صغرك .. وبتشوف كبري
دام الزمن ماعلمك أي حاجه ..!




.
.

.