الخفافيش

رضا الهاشمي · 02-13-2019, 07:55 AM

أصْنع من اللاّشي أشْياء ما ميش

منْها و حقْها كلّ شي ٍ بلاشي.

بلاوي الأيّام من دون تطنيش

تسوى التقلّب بالسهر ع الفراشي.

في درْب همّك صير مثْل الخفافيش

ما اتْشوف حتّى لو ضربْت الفلاشي.

طنّش ترى بتريّح البال واتعيش

وما كلّ شي ٍ تاخذه بالنّقاشي.

بعْض المظاهر تنْفش الكِبْر كالرّيش

يا منْ حسبْت إنّ السّماوات كاشي.

ما كلّ متْسوّل تحسّبهْ درويش

وما كلّ منْ يهْديك تحسبْه راشي.

طوْلوا اللّحايا و قصّروا هالدشاديش

إنْ كان خوف الله في القلب ناشي.

قضيت عمْر وْظيفتي طيش في طيش

و وْظيفتي مفتاح باب المعاشي.

كيف اطلب الله ايبارك الرزْق و العيش

وآنا أهيت وما أحلّل معاشي.

وشْلون تطْلب راتب وتطْلب اقْريش

وانته قبل ما ينتهي الوقت ماشي.

والنفْس لو خلّيتها دون تفتيش

تقْفط مثل قفْط الخَلَقْ و القِمَاشي.

واللي جعل سُفيان يِسْلِمْ من اقْريش

ما قال ما يِسْلِمْ معاه النّجاشي.

منْ فوض أمْره ما حكى يوم بدّيش

قال الله ويْش ايْريد آنا أماشي.

بعْض القلوب اخْشاب تحْتاج ورْنيش

وما زيّن الورْنيش خفّاق واشي.

شاش الفِكِرْ و إنْ شاش شعْري ترى ايْشيش

والشّعْر يا محْلاه لو يوم شاشي.

ايولّد الأفْكار منْ دون تشْويش

وايْعلّمك إنّ القَوافي تَمَاشي.

و في داخلي من ظلْمة النّايبة جيْش

حاصر حصون السَعد واجتاح جاشي.

حتّى تهادت هالقصيدة وانا ويْش

دون الشّعر في ضيقتي و ارْتباشي.

الله رَفَعْ الإنْسان يا صاحبي ليش

لأنّه يحسّ وْ ما تحسّ المواشي.

و إلْيا شَعَرْت بْحزن أكْتب خرابيش

يمْكن تحسّس خافقي بإنْتعاشي.