أجنحة وأغاني

[مشعل فايح]

جيتك يديني تنادي لك من آلامي
أمدها من تعب روحي لك بلهفة
جيتك اهنيك بأول بسمة أعوامي
يمكن جديد العمر به لجلنا وقفة
ضربت عيني بكفّك ... طحت قدامي
ميّت.. تذكّرتك.. وردّت لي الرجفة

[مشعل فايح]

حاولت اجاريهم عشان الذوق
مابي اعكر صفوهم فيني
لقيت نفسي تحت.. والهم فوق
وحروفي تعاند مضاميني
ما عادني يا خافقي مخنوق
الله يسامحني ويهديني
بأسكت.. سوا لي حق.. او محقوق
بس المهم.. ارحم شراييني
نزفت.. مابي من ضيا وشروق
والليل.. كان أخر محبيني

[مشعل فايح]

سمعت ابوي يقولها يوم انا شاب
كلمة.. وهي أول خطاوي جروحي
البيت ما يبنى بلا عمد واطناب
وبيتك بلادك... كان تسمع وتوحي
من يومها.. حسيت بإحساس الأغراب
ومن يومها.. أدور عن اطناب روحي

[مشعل فايح]

بعض الأوطان نلقاها وسط غربة
وبعض الأوطان مفقودة بأماكنها
القلوب.. احتمال الماي.. والقربة
منهو اللي ملاها.. او شرب منها
وقلبك اللي يغافلني ولا اشعربه
موطن الما.. ويامر قلبي وينها

[مشعل فايح]

عطني عمر يكفي .... لتجديف الأعمار
واقول لك تامر .... ولك عندي حقوق
يا قلب...... لو ما ذا الأمل كان مسمار
على ضلوعي .... من يد الحلم مدقوق
ما صرت وحدي في زمن سبر الأغوار
اجدّف الغربة ....... بمجداف محروق

[مشعل فايح]

ياريم ليش الزمن نهّاب
يسرق فرحنا وينسانا
على طريق السكوت اغراب
الا من حروق ذكرانا
يابنت.. ردي على المرتاب
ويش اسود الهمّ لولانا
وحدة.. وصمت.. وبدون اسباب
ما تزهر ورود دنيانا
مادامت الأرض ما وتراب
تكره فرحنا ولقيانا
وما داموا الناس والأحباب
ما حسّوا بلحظة بكانا
سألتك بربّ هالأرباب
نلقى وطن يعشق خطانا؟

[مشعل فايح]

يقول: لي صاحب.. احبه واداريه
ابوح له سرّي وانا بير سرّه
اشتاق له لا غاب عني واحاتيه
ويشتاق لي وان غبت عنه يتشرّه
واقول له: لي صاحبٍ حيّ وانعيه
ليته كفاني بس خيره وشرّه
يحبني كثر الزمان ومآسيه
وعلي يغار من الفرح والمسرّة
ما اشتقت له ليلة عشان احتفي فيه
وما احتجت له لو بي تضيق المجرّة
لي صاحبٍ عايش معي بس في تيه
يشبه لصوت الحزن بي يوم اجرّه
هذاك انا يا انت.. لا تبتلش فيه
ما به سواي اعرف خيره شرّه

[مشعل فايح]

قلت انا مشتاق لك
مشتاق للفجر بوجودك
ملّني هالليل..
وفاحت عيوني هيل
لما قالت..
والله ضلوعي مبلله بالشوق.
مالت.. مالت الشمس
وتحايل ضيّها وغافل عيوني
وانحنيت عذوق.
سالفة هالليل طالت.
يا الرياض..
ليه سرقنا العمر ليلة
وما لقينا شيّ منا.
في النهار.
احسب الأيام نبضاتي
واحاول ابتسم حتى لمصابيح الطريق.
ما قرا العارض شفاتي
ولا انحنى لي طويق.

يا الرياض.. يا ما مشيت
وكل مرة لا تداخل ظلي فبعضه
انتبهت
يمكن انتي وما انتبهت.
وكل مرة اشرب القهوة اشوفك
في عيون العابرات
تشرق بعيني عيونك
وانسى اني كنت اخونك
لين من جرحي انجرحت.

تذكرين ايامنا الحلوة هناك.؟
بين ضلعينك معاك.
قهوة خزاماك.. والا شارع الستين
من عبر فيك لدروبك ولجسورك
من لمس وجهك غرورك
الشوارع.. المقاهي.. المكتبات
الأغاني.. القصيد .. النايفات
كل شي فيك افتقدته.
مو قليل اللي يصير
حتى مشعل صار غير
انا فقدته

والله انا مشتاق لك
مشتاق للفجر بوجودك
مشتاق انا لوجهي بوجودك
ملّني هالليل..
يا الرياض.. انتي اللي رديتي
وقلتي: والله ضلوعي مبللة بالشوق.!
وفاح دمعي هيل.!!