أجنحة وأغاني

[مشعل فايح]

عسا ما حبّ ؟؟
تمرّ وما تسلّم لو بعين أمسك
وشمسك جافلة للغرب!!
عسا ما حبّ؟

أنا مثل آخر الأيام بأحضانك
هذاك اللي كثر حبّك
تظن انه اذا اتبسم معك خانك
ولا خنتك ولا عفتك ابد يا قلب
عسا ما حبّ؟؟

[مشعل فايح]

تجفل مراياه من وجهي وأصلّي وحيد
وانا اللي أحييتها في ليل هجرانها

الأسود الخاشع لصمت الخشب والجريد
على عيوني ... تكاثر رفّة أجفانها

مالي ملامة على الأشياء ما دامي بعيد
وما دام روحي تساقط طلع بستانها

لومي نما في سما صدري وزهّر حديد
دونه ضلوعي تصافق درف بيبانها

يزيحه الصبح، واتأمل بليلٍ جديد
صفحاته أطهر من الليلة وغربانها

يا حادي السهد، بلّغ للقوافل نشيد
تضيق به حنجرة حدّاي ركبانها

لا كثّر الله ... خير مجمّعين العبيد
انا حياتي ... كفاني لعب صبيانها

[مشعل فايح]

يفوح الماء على جمر الغلابة، والسواعد كيّ
من أطراف المناقد والرماد الصبح للسافي

يغيبون، بخدر أطرافهم، وأسهر بدون إيديّ
ولا أسأل من سرق من مرقدي جفني ولا اطرافي

أنا العاشق مراويح السحايب والشتاء والضيّ
أشوف الصيف غربل مهجتي وأستنزف أوصافي

وأنا المغرم، بوردات الربيع، وعذب نبع الميّ
رجعت استعذب إهدار السموم لتالي أطيافي

أصبّ الليل في كاسي أرق وأشرب لحدّ الريّ
وأحس الناس في راسي تجادل والضيا طافي

وتمنيتك، ابي صوتك، بضجة هالجموع شوي
لو اني ما طمعت بوجهك المتبسم الجافي

وحيد، بدونك وكل البشر من ضيق صدري فيّ
وانا ماني بـ أحد غيرك، ودامي بك كذا كافي

[مشعل فايح]

عتق، ذبلٍ سرت بعضامه سنينه من الصدعين
ذوى من قبل مايعرف سبب للقيد واعتاقه

طفق يخصف على السوءة ولكن مالقى له تين
خصف صبّارتين .. وسال دمّه والتوى ساقه

وجل أو رهبة العمر العتيق برجفته للحين
بعد عشرين عام من اختناقه .. سلّم خناقه

يارب النور، بجدار الليال الهُمّل وبعدين
على ضفة ضياك .. وخلفها غيهب وبواقه

يارب العدل، وسلاح الغريم مدرّع ورمحين
وابو حبّك، يدٍ جردا لفت من محبس وفاقة

يارب الصدق، وان لاحت وجيه الصحبة الباقين
رمادٍ غافله وابل خريف ... وحاول اغراقه

يارب الذبل، عنقه دار للجدارن والصدعين
كأن السرّ في قيده ، ما كان السرّ باعتاقه

[مشعل فايح]

جيت من ليل البعاد اللي تعرفه
لابس ثوب الوداد اللي نزعت

وانفتح في صدر ليل العمر شرفة
من ضياها ضاعت حروفي وضعت

شف لك بهذا الفراق المرّ صرفة
لا يضيّع من حياتي ما جمعت

ما لوجهي عين، باللوعات ذرفة
بس تالي الوقت لو أضحك دمَعت

[مشعل فايح]

وأسامح ..... والأجر من خالق المخطين
وأمررها بكيفي، وأسكت بكيفي

ما أخذت من البشر درس الدروس سنين
تكوّن منها قبل الجسد طيفي

ما كان الدرب هيّن ... ( سكّة التخمين )
تشلّ العقل، لولا طول تكييفي

أنا مخلوق ....... لو كان البشر من طين
من أحلامي ومن تيهي وتكليفي

الين أصبحت أعرف أسرار ... كل إثنين
وكان الإتهام المرّ : تجديفي

وبمررها ........ مثل كل الكلام الشين
واسامح والسماح أصدق تخاريفي

وثياب العزّة ....... اللي خاطوا بكمّين
لها تعريفهم مُنكر بتعريفي

بسامح ..... لين آخر نبض طرفة عين
وأمررها بكيفي، وأسكت بكيفي

[مشعل فايح]

لو كانت بكيف المواعيد ياسعود
الف وتسعمية وتسعين ....أردّه
وأوقّف اللحظة على ضحكة خدود
طفلٍ نسى عمره بحضن ومخدّة
مرّه دفنته .... يوم شالتهم النود
والثانية ...... دفنته بقبر جدّه

[مشعل فايح]

من مدّ ليلي مهجعه للمبيت
وتلملت من حول أهلها البيوت

طريت لي ياليت لي ماطريت
ضجيت في راسي معك الف صوت

ما بعت، لكني بعد ما شريت
والشك كنت وكنت أنا اْمر الثبوت

ما قلت لبّسني إلين أهتريت
لو شفت لبّاس الكبك و البشوت

أفضت لدار الحق كلمة وفيت
ما باقي الا الموت دونك نموت