لملمة شتات !

[سلطان العتيبي]

اليوم هذا غير / عن كل الأيام
خذتني الذكرى .. وسجلت ذكراه

مرت سنة .. كل ليلة انسج بها أحلام
واليوم حلمي / ليتني قادر أنساه !

[سلطان العتيبي]

كنك بعيد / ادري بك / من اقرب الناس
اقراك / واعرف كل قصة حياتك !!

اي والله ادري بك / وعندي بك احساس
والكلمة االي ناشبة فيه لهاتك !!!

[سلطان العتيبي]

ايه انعشيني بالجنون وتعالي
باسلوبك اللي يكتشف لك جنوني

ياحلو تعييرك علي في هبالي
لا يابعد كل الذي عيروني

واليا سألتي وش لقيت ب / دلالي
اقول بعضه / منه تبرا طعوني

واليا سألتي / وش تقول بجمالي ؟
اقول بعض البعض يكحل عيوني

[سلطان العتيبي]

مصدقك .. لاتفسرين اختلافي !
نفس الكلام اقوله انتي بعد غير !

وازديك اكثر لو اقول اعترافي
متميزة حتى ب / تصبح على خير

[سلطان العتيبي]

قالت ترفق / ترى طقك بميت حرام
اجيك بعْتاب / ويجنني اسلوبك !!

أجيك ب/ ذنوبك وتقلب علي الكلام
وارد مالي سوا / الاعجاب بذنوبك !

أحاول امشي معك على رتوش ونظام
والقى التفاصيل ضاعت في طرف ثوبك

[سلطان العتيبي]

اشوف باحساسها نسخة من احساسي
والله مدري من اللي سارق الثاني ؟

[سلطان العتيبي]

قطعت فيك حبال كل الرجاوي
الا الرجا في / موقفٍ تذكرينه

لعله اكبر من جميع الهقاوي
اليا لذع قلبك ولبى / حنينه

حتى رسول الحب مل الدعاوي
كل يوم عذر وباكر تغيرينه

ماعاد ادور من وراه الحراوي
بالياس / مابه شي بيني وبينه

[سلطان العتيبي]

فديته اللي لحالي مايخليني
كل ما نويت الزعل عليه ما امداني

ماجا ولا جيت اسليه ويسليني
لكن نفس الذي ناداه ناداني