لملمة شتات !

[سلطان العتيبي]

الكلمة الصادقة تبقى ب / رغم الظروف
مهما المواقف تغيّر ماتغيرها !!

انا خبيرٍ بها من كثر ما اسمع واشوف
لاتحاول انك على مثلي تمررها !

اسايرك وانت تحسبها عليّه تطوف
وتغترّ بسْياستك / ترجع تكررها !

وانا على نظرتي ياللي فهمت الحروف
اللي تمنّع علي مانيب أعاسرها

[سلطان العتيبي]

من يجبر الخاطر المكسور ؟
من يسمح الدمعة الزرقـا ؟
العبرة / وسدت الحنجـور
مع النفس تنـزل وترقـا !!

[سلطان العتيبي]

كل شي عرفت افسره وافهمه
غير تفسير / كيف تصير ( فزة خفوق )

حالة ٍ تعتريني مالها ترجمة !
زود نبضات قلب وزود نبض العروق

[سلطان العتيبي]

نشكي ونبكي . نحكي , نعيـد ونزيـد
لين اقتنعنا ب حكمة / الصمت حكمة !

[سلطان العتيبي]

مااسمّع اللي طلبني ماضي ابياتي
والعلة المانعة / نسيان ماقلته

ويقول دوّن قصيدك بالسجلاتي
واقول انا ادونه / لكن ماشلته

لكن طلبني حبيبً فدوته ذاتي
وهذيت شعري بشكل ٍ ماتخيلته

ذكرت شعر ٍ قديم من بداياتي
حتى الذي بأوله / بالحال كملته

[سلطان العتيبي]

سجيت انا وياه عن باقي الناس !
مرة يراعيني ومره أراعيه !

ارعاه قبل العين في قلب واحساس
لكن وش هو للمراعاة حاديه ؟ !

[سلطان العتيبي]

احيان تجبرني على داعي الشوق
واحيان تذبحني بكتمان الاشواق

[سلطان العتيبي]

تعـال نتقاسـم جمـرة الشـوق تـدري
وش اللي حداني واشتكي جمرة الشوق !