لملمة شتات !

[سلطان العتيبي]

قلبي غلب عقلي وباسبابه اخطيت = حقك علي ..لك حق ماتسامحيني
مالي كلام يحتمل كيت ٍ وكيت = غير العذر ماعاد شي بيديني

[سلطان العتيبي]

مشكلتك تعدني سياسي وداهية = وان الكلام الذي ( تستاهل ) انمقه !
وهو حقيقة بعض مشاعرٍ خافية = وشلون ابقدر على باقيه وتصدقه !

[سلطان العتيبي]

غنيت لك وانا ما اعرف الاغاني = وياما طلبتيني أغني وعييت
مدري وش اللي للاغاني حداني = الظاهر اني منهبل يوم غنيت
غير الاغاني .. لو جرحت المحاني ! = عديه طور هبال حتى لو اخطيت

[سلطان العتيبي]

ياكبرها .. كان تفكيرك = اهمشك لو تهمشني
لو قلت ابقبل معاذيرك = كنك مع العين تنهشني

[سلطان العتيبي]

يقولون والعهدة على اللي يقولون = على قدر ماكَبْر الغلا تصغر الزلة
وانا أقول ياستار ماشفت ذاللون = لعلل الخلل بالقول ..مابالغلا خلة

[سلطان العتيبي]

بين امس واليوم دربي بالهوى حاير= والشعر مع حيرة الدرب اشتكى حيرته
شوفيه كنه وقف بنْهاية العاير= بين اشتباه الدروب ومبتدا سيرته
اذا فقدتيه لومي حظك الباير= يوم اشترى جيرتك .. جرتي على جيرته

[سلطان العتيبي]

أمانه لادعاك الشوق تقرين الغزل مني = ولا لك حيلة إلا بالرجوع لسابق ابياتي
أمانه حكمي فيها ضميرك .. تخبرك عني= ولا تلقينك الا نايبة عني بشرهاتي

[سلطان العتيبي]

لابن عمي موجهها لي

لو زماني جار واصحابي جلو=رحمة الله ماتقفل بابها
لي رفيق مثل ابن عمي ولو= أطلب عيونه قلعها وجابها
لااذكرني ماحسبت لمن سلو= فدوته ذيك اللحى وأشنابها

الرد عليها
ياقديم العد ياراهي الدلو=من نباتك ماحسبت حسابها
مانساوي من دنو باللي علو=فارقين صقرها وغرابها
أنت نركض لك ونهرف بعد ألو=يوم حاصلها الحفا بأكعابها