الفُرَصْ

[حسام المجلاد]

يكفي عتب ياصاحبٍ ماخفاه الحال
على اللي يفوت من الفرص لا تحسّفني

انا ادري عتبك من الغلا وانت طيب فال
ولكني أرفض موج الاسفاف / يجرفني

مادام الشعر في داخلي له قدر وإجلال
حرام اني اصعد منبر ما يشرفني

مقامي عزيز وعزة النفس رأس المال
ومن صد عني كِبْر ما قلت له شفني

وإذا أخطا عليّ الجاهل بسمرة الجهال
ترفعت.. ماكن السوالف تَخَطّفني

انا ما رضيت لـ باهت الذوق القّي/ بال
إذا ذمني.. ولا بمدحه.. تألـّفني!

لو أرخيت سمعي للمشاريه: قيل وقال
نسى القلب طعم الراحة وماغفى جفني!

أنـا شـاعـر حروفي عليها الجزاله .. "شال"
يقدّينـي الحِلم .. إن نوى الغيض يحرفني!

أسامح .. لـو الأعـذار ماهيب دوم جزال
ولا أظلـم بلـحظات الغضب من يخالفني!

مـع الناس.. تكفي بسمتي بأصعب الأحوال
ومـن الشعر.. يكفي شعرٍ إن ضقت يسعفني

على ايـش العتب ياصاحب الروح / والموال؟
.. وفوات الـفرص ياصاحبي ما يخوّفـنـي!

..وإذا إني خسرت من الفرص شيّ.. شَرّ وزال
كسبت احترامٍ ما ارخصه لو يكلفني

كفى شعري.. إنه نبض عاقل كتب بهبال
يمرّ الحبيبة كل ليلة وتنصفني!

تلد العيون إعجاب ولّا تصد إهمال
يكفيني إن عيونها الحور تعرفني!!