من على شاطي (مدن) غنيت والقرية حزينه !

[فهد الماجدي]

للتواصل مع التحية والاحترام

,’

من على شاطي مدن .. غنيت والقريه حزينه
............................. واِنشدن كل الطيور اللي بها / حزن وأغاني


بلل الدمع المناظر .. واِدمعت عين المدينه
............................. واِنغشا بعيونهم لين .. انتثر بحر ومواني


(اواه ياحزن المدينه)..والمراكب والسفينه
............................. والشراع اللي يرفرف من عنا الفرقا بكاني


مابخل نهاّمها.. يسحب بها المغنى .. وعينه
............................. تذرف وحامل من اوجاعه الّم للموج عاني


اش يّصبّر مرهف الاحساس والعمران شينه
............................. مايبي غير الطيور .. وشاطي ٍ ريحه جناني


في غروب الشمس .. والامواج تغشاه السكينه
............................. منظر ٍ يسوى المتاجر.. من ذهبها والاواني


قرية ٍ ماعاش فيها الزور.. كلن من يمينه
............................. يكتسب رب ٍ رزقها / يوم للغواص شاني


سبع بحر ٍ مايهاب البحر والقرش وقرينه
............................. مايهاب الموت بيّاع العمر والعمر فاني


واعذاب القلب لامنه.. رحل .. شدّه انينه
............................. كل ماهو حل طاري .. شاطي القريه يعاني


من يلوم العين .. والدمعه لها ذكرى حنينه
............................. من يلوم القلب لا صار المفارق مايداني !


,’