(( حيّ المَنَازل والأَطْلال ))

[عبدالعزيز رشيد]

لـ رسم المنازل

.
.

حيّ المنازل رسمها الذاري بقايا أزمنه
_____________ماغير فيها هالصدى صوت اجودي ردّ السلام !
بير الأمل عاطل بعذره مالقى من يضمنه
_____________ملّت يدين الناس تدلي بصبرها من عام وعام
عامود خيمه مايل ومتروك يامن يوزنه
________________كنّه بكى ومال وتذكّر ناس يحيون الخيام
كم طير جاها وشاف جنحان المحبّه تفتنه
_______________وهناك طير منتثر ريشه بكى ذكرى الهيام
مدري الغيوم عيون تبكي من جفاف الأمكنه
__________طيّب بكت ..! وين اليدين اللي تواسي يالغمام ؟!
شفت الربيع وبصمته باحدى الزوايا بسوسنه
______________والله وشفت السوسنه رمزٍ لبقايا من وئام
كانت هنا قصّه حَيَت باحلامها متلوّنه
_________________والله وصارت قصةٍ تغتالها بنت الظلام
ثغر المكان يقول : ياماكان حلم وغيدنه
_________وْعيني تقول : الكان بعده واهيٍ مثل الحطام !!
اطلالها تسمع شكاويها ومن دون ألسنه
______________ياكثر ما شفنا رسوم الأمكنه مثل الكلام
مدري لْمَعَت في داجي الظلما عيون وسلطنه
________حول الحياة اللي ارتمت مستسلمه وسط الزحام
كم واحدٍ جاها وتركها ناسيٍ من كم سنه
_________________ماغير لحظتها رثتها لفتةٍ فيها خصام.
حيّ الملامح رسمها فيني بقايا محزنه
_____________مثل الديار اللي هجرها احبابها بعد الغرام !
افراحها لو عندها بالحيل ماهي بيّنه
______________أو ميّته حتى رثتها بنت سموها ابتسام ! .
.
.


وتحيّة لـ قلوبكم
وشكرٌ لأرواحكم