أنشودة سائح عربي لوطنه ..

[خالد الداودي]

يا َوجْهْ /
يا َوجْه انا قررت اقطّع
كل تقاسيمك وامنح
بسمة السياح تأشيرة عبًورِ صادقه
لمدخل شوارع ضيقتك
واغرس ..
على اليابس من الداكن حنين
يثقب الغيمـه ويغسل ما تبقى
من ظلام الذاكره المتناثره بسفوح جفنِ
وقظّ الليل وتوظا
دمعة بلت كفوف الذنب
ثم صلى وقاره
بإنحناءة ظهره المتشبث بركعه اخيره
للضياء .. جيتك ارّتل
في مسارح عزلتك ثورة جنونك
اغلق الجدران واطلع من عيونك
بإرتباك في دمي يشبه شرودك،
َصمْتي المتواري بجلدك وينفض!!
ادمية شعر او حس آدميه
يحتفل بالجرح في ردهة عروقي
ساخرِ منفي ومتشظي لعوالـــــم
ما تغني لحن به نبرة فراقي ..
جيتك اصلب ..
كل اوصالي على ارض الكتابه ..
انشد النغم لسماء طلع القصيده ..؛
بلا نخل عاري يماري بي يباسي
كان لي ظلِ وتساقـط لي جــريده
كان لي برد وتوسمته لبــــاسي
كان ليّ وكنت له واليوم اسأل
يا وطن من يعتني بكْ.. ؟
يا وطن من يعتني بكْ.. ؟

حمرة اشراقك طفت من عام واكثر
ماي عينك جف .. ْبالاحـرى تبخر
ليته امطر .. في كفوف الرمل ما ينبت ظلالي
يا ظلالي .. كنت اخضر
وارف الغصن متوغّل في ضفافي
يا ضفافي من جفافي
سالت بفجوات روحي لك اغاني
رددتك وقلت للبحر المواني
رددتك ورددتك وجيتك اعزف..
كل مقطع من تقاسيمي عليـك
اليوم ابنثر
ابجدية شعر تنسجنـــــي عليك
اليوم ابذرف
لك نحاس عيوني اللي ما تصهر
لك نحاس عيوني اللي ما تصهر
ياوطن باكي عليك ..
يا وطن باكي عليك ..واشعر انّك..
تحتمي بصمتي وتستنشق حروفي
تقنـــع الذكـــرى بلا داعي لخوفي
وانا لي قلبِ من اللهفه يبيك/ وفيك يهذي ..
ما تبي اكتب جراحك ؟

لأي حريه تبي ترسل جناحي
وانت قيدي وسجني اللي
ما رضى يطلق سراحي
بيدك ارسمني تشكلنّي تجسدّني بحراحي
لوذ بي بعد الفرار ارجوك مرّر
كذبتك موجود في كل النواحي
لأجل لو تغفى عيوني ..
فيك اشعلك بسكوني
للدجى مصباح او اطفي صباحي ..
يا وطن حالك غيابك ..
يسكب الفجر ْبمرارة صبح
يتقوى طواحيني .. رياحي
تحتسي حتى شفاه الصمت حزني
واشرب آهاتي دخانٍ من فراغي
احترق بك واحتفل بك ..
في محطات السفر داخل عيوني
لأبتكر لك نغم خالص
عاطفي الشدو يتغني بصوتي..
مخملي الحـزن يترنم بمـوتي..
في شراييني على الغدران ينده
يالربيع العطر ياللحن المهاجـر
خذ تقاسيمي على الشرفات غنيّ
انهك الليل الحزين وبات صاحي
يا وطن باكي عليك ..
يا وطن باكي عليك ...

ارسم اطيافك على لوحات شعري
ترتسم لي منك شمسي
تشرق وتغفى بهمسي ..وآتذكر
لك ضحى مره تدّلى!
خلف نافذة الهموم وبان شارع
لك عمر فيني تولى
يسحب الظل الـ/باقي لماضي الحلم المضارع
لك عبث فيني يتســـاءل
لك عبث فيني يتســـاءل
يا وطن كيف العيال ؟؟ يا وطن كيف العيال ؟؟