نافِذةٌ تُطلُّ عَلى بُكاءْ . .

[الموج]

أنَامْ !؟
وهَذا صُوتَك الدّافيِ
إذا جَيتْ أرْخَي أجفَانيِ
يصحّينيِ . .
يُقول ليِ : قَمْ ،
تَعالْ وافتَرشْ صَدريِ ، سمَا
ثَمْ " نَم " . . !
وأتعثَّر ،
أبِي أوصَل لإيدَك بَس
ما اقْدَر . . !
أحَاولْ أمشيّ لَدربَك . .
وتتكسّر
أمَانيِ وأغنْياتْ وحَلم . .
وتُقول ليِ نَمْ ؟!

 

[الموج]

يا أنتَ العاشَقْ الصّامتْ . .
تَعالْ شويّ !
خلّ أذنَكْ عَلى قَلبيِ ،
وهو يحكيِ . .
عَن غِيابكْ . .
عَن الليّل الحَزينْ
وصُوتْ شبَّاككْ !
تعَال شويّ !
هَنا كلْ جَرح يندَه لكْ . . تعااال ،
ولا تخلّينا . .
تَرا هَذا الزّمن ظالمْ !
تَعالْ شويّ . .
بغنيِلكْ ،
ببكيِ لكْ ،
بنَامْ شويّ . .
قَبلْ ما يطلَع بوجْهيِ
صَباحٍ مختلفْ دُونك !
أبحكيِ لَك . .
عنْ الحَلم الصّغير ،
وكَيفْ يكبَر بكْ . . !
عن أنتَ . .
والفَراقْ الليّ /
شوَّه لوْحَة أياميِ . .
عَن الحبْ العظيمْ الليّ انبَنى
في خاطريّ : لَك . .
تعَال شويّ . .
أبي منَّك كثيرْ أشياء . .
أبيِ قلبَك ،
رَمشْ عَينكْ . .
أبي ضحْكاتك وصُوتَك . .
أبيِ كلّك !!
تَعالْ شويّ ،
و خذني لَك !
انا مابينيِ من دُونك . .
تكلّم وشْ هِي أعذَاركْ ؟!
ترا اللي صار بَغيابكْ / مَن اسبَابكْ . .
تَعالْ ولَملَم الماضيّ المحطَّم . !
وارجَع " أحبَابيّ " . . !
تَعالْ شويّ . .
أنا استأذنكْ . .
إذا تسمَح . .
أبيِ كلَّك !

 

[الموج]

ولا يهمَّك . . .
بكُونْ بخَير ، وأنَا غَافيِ وسَط
[ حضّنَكْ ] . . !

 

[الموج]

وش سرّها هَذي العُيونْ ؟
إذا اضْحكت ،
اتبسّمتْ كل الوَجيه ، واشْرقَت !
واتفّتحتْ مليُون وردَه
وانْبتتْ . .
وكلّ الكُفوف . . أورَقت ، واتنفّست ،




أقرَب تَعالْ . .
مدّ لي إيدَك ، أبتحوّل عَطر . .
لا مو خَيالْ !
آنا أعرفكْ ،
دايم تَجينيِ
وكلّ ابو الدّنيا ظَلام . .
ما ودّك أنيِ أسَرق عَيُونك ،
وأخبيِها حَنينْ !
ما ودّك إني أقطَف شَفاتَك ،
وأعلّقها مَنامْ !
أنتَه تَعال . .
آنا أدريِ بكْ ورا ظهْرك
تخبّيِ لي " حَمامْ " . .
اطلَقه !
خلّه يطيييرْ
يمْكَن جَناحه يتّسع
ياخَذنا لحَد الغَمامْ !!
انتَه تَعالْ ،
و بوسَط قلبيِ / بضمّك !
لا تَخاف . .
ما بترَككْ
هّذي إيدي بالوَعد / تكلّمَت . .
يلا تَعالْ ،
هَذا العمر ما ينتَظر !
يلا تَعال ،
وازْهَر بعمريّ . . عَمر !




ما قَلتْلك ؟!
أنّها عَيونك
مصْدَر لكَل الجَمالْ ؟!
شلُون أطَير ،
وما يكون الرمشْ جَنحان وسَحابْ ؟
شَلون أغنيِ لَك ، وهَذي
نظرَتكْ تُوحي بِغيابْ ؟!
هَذي عَيونك ،
وشْ يَصير الكَون لا غابَتْ عَيونكْ ؟!
يمتَليِ صَدر السّما
بمَليونْ باب ،
ويمتَلي خاطر حَبيبك بالعتابْ ،
وتنطَفي أفراح قلبيِ ،
وتنقَتل كل الامانيِ ،
وألف طفلْ يموت فيِني !
ودّه يعانَق عَيونك !

 

[الموج]

جَيتْ لَك . .
كلّي أمَلْ ؛
أنَّك تخبِّينيِ " حَنينْ " !
دُون تَسألْ ( وَش حَصلْ لك ؟ ) . .
ولَيه دمْعَك عَانقْ الكَحل بَعَيونَكْ ؟
وهَذا وردَك . . لِيه يذبَل ؟

والله مَحتاجَه أضمَّكْ !
وأنسَى كلّ الكُون بينْ إيدَك ،
وأقولْ إنيِ أحبَّك . .
بسْ أنتَ خبّنيِ في وسَط صدَركْ !

خَذني مَجنونَة ، وتحبَّك !
ما تبيّ أي شيِ غيِرَك . .
قلبَك أحسَاسكْ وعَينَك . .
خَذني طَفلة !
ما تَشُوف أحلامَها إلا فَ قربَك . .
ما تَعرفْ مَن الوَجيه . . غَيرْ وجْهَك !

هَاكْ عمريّ لَك ،
وأنَا يكْفَينيِ " كلّك " !
كلّ ابو احْساسَك بَلاد
ما بَها منْفَى ، وأنا لَك صَرتْ شعبَك !
ما اخُونَك . .
ما اخُونَك . .
ما اخُونَك . .
لو يَصيرْ الكُون ضدّك ،
ما اخُونَك . . !

 

[الموج]

انتَظرتكْ . .
تحضَن الصّبح بعَيونَك . .
تزْرَع الدّنيا بَكفُوفَك
ورد / ضحكَات . .
وأمَانيِ !

انتَظرتَك ،
تاخَذ من اللّيلْ . .
أوجَاع / و بَكا
وتَقلبْ الحَزن بَعيونيِ
أغنِياتْ !
وتاخَذ أياميِ مَعاكْ . .
شالَ دافَي / كُوتْ في ليِلَة شَتا
أو حَضنْ تغفَى بَه وتنسَى

تنسَى هالأرَضْ الشّحيحَه
كَفوفْ ناسٍ ،
شوّهت وجَه الحَنينْ
وما تَبيحه !
تنسَى كلْ حَاجة حَزينَه . .
وجْهَي / اعَيونيِ
وقصّتَنا الأليِمه !
تنسَى وسَط الزّحمة هَذي
ألفْ خنجَر . .
انغَرس من دُون ذمَه
ف صَدر هَذا الحبّ
وأعمانا نَزيفه !!

انتَظرتَك . .
تخْرَس أصواتَ الفَراقْ !
وتحرّق بجيَّتكْ
صَالاتْ انتظَار . . .
تلمّني . .
طفلَة أوجَعها غَيابكَ
تحتَضَر ،
في كلّ موعَد
ما يَجيبَك !

انتَظرتكْ
حَلم لوّنته بكرّاسي . .
وفجأة . . !
غابْ عنيّ . .
ضَاع من كرّاسيِ
وإيدينَي اعجَزتْ
لا تَرسَم بصَدر الزّمانْ
حلمْ غَيركْ !
كنت أبيكْ . .
وفي لَيالي البَردْ . .
كَنت اصْرَخ
من الليّ يكسَب بقَلبي أجَر . .
و بس ياخَذني عليكْ !
والله محتَاجه لدفَاكْ . .
واتعَبتني هالليّالي البَاردة
كنْهَا " جَفاكْ " . . !

انتَظرتَك !
ليين صَرتْ الحَينْ كنّي
وَجه آخر لانتظَاركْ . . !
وجَه باكَي . .
منطَفي حيلْ بَغيابكْ !
وجَه صامَت
ما يتكلّم !
وجَه أتعبْه الحَنينْ . .
وجَه له صَوتٍ حَزينْ !

وما تَلاقيِ في غَيابْك
مثَل حزنيِ !
حيييلْ صَادقْ ،
ما يخُون الحّب وإحساسَه حَرييقْ !

 

[الموج]

ما عاد يشغلني حنين
ارحل كذا . .
ولا تكثّر اسئَلة !
لا تنهَر حَروف القَصيد
هي ما اكذّبت !
ولا عَصت
بس أنت جَيت بهالَعمر
صدفَة
وأنا . . .
تَرهقني حيييل الأسئَلة !

قلبي كذب !
هو بالأصل
ميّت حَنين
مثلي أنا !
بس اعترافَه يذبَحه
لأنّك بعيييد ،
مثلي تحن
لكن عَنييييييد
تَكابر بوجَه العَمر
وأنتَ أساساً
يرهَقك بَعدي
وأنا
مَثلك . .
أدّور أجوبَه !

هي بَس كذا !
ليلة إذا مرّت بدونَك
اكتَئب !
وشلون لو مرّ العَمر
وأنا بَدونك
كالوحيد
اللي ترك كل شي
لَجل يظفَر بقلبَك
" كل شي " ؟
ما قَلت لك
ترهقني حيييل الأسئلة !؟

 

[الموج]

مَا تدرينْ ؟
بأنّه بُعْدجْ أتعبَنا . .
أنا وقَلبي !
وهَذا البَيت فَ غيابَج
فَراغه صَار / يهدّ الحَيلْ ؟!
هَنا صُوتَج . .
هَنا ضحكَج . .
هَنا حضنَج . .
هَنا أنتِ !
هَنا كنتِي تضمّيني
( لا تَبكينْ ) !
وهَنا كل العَمر أنتِ . .
وش يَبقى إذا تَغيبينْ ؟
تَعاليِ بَس
أبي أغفَى وسَط حضنَج
مَثل ما كَنت !
أبي أرجَع صَغيرة بَس
بَعيونَج !
تَعالي مَثل ما كَنتيِ . .
وحَشني صُوتَج الغَايب
عَن أيّامي !
خَمس شَهور ،
هدّت في حَياتي شَعور
كَان أعظَم من الحبّ !
وكَثييير أكبَر من الفَقد
وحَنين أرهَق غَرف هالبَيتْ . .
كَذا فجأة !
بَغمضَة عَينْ . .
سكتّي ولا نَدهتينيِ
( تَعالي شويّ ) !
تَعالي بَس . .
كَفاية غِياب ،
وغَربة صَمتج المُوحَش !
تَراني اشتَقت لَج أكثَر
من المُمكَن !
كثر ما وديّ هاللحظّة
أبوسَ الحنّا بإيدَج !
كَثر ما أنا
أبي أتعطّر بَصوتَج . .
تَعالي لا يُطول البَعد
هَنا كل شي يحتاجَج !