(( تمتَمَه ))

[أكرم التلاوي]

وش فيها يدّك ترتجف ؟
بردان ؟
دوّر عن دفاك
خايف ؟
ترى ربّك كفاك
مشتاق .. غايب لك وِلِف ؟
لا منّك تموت اِبتِخِف !

 

[أكرم التلاوي]

‏يا رب الحزن
واوجاعي
خراف الذاكرة تاهت
ولا لي ناي
ولا عندي عصا فيها اهشّ بكاي
سوا تلويحة ذراعي
شسوي لا غديت الذيب
والراعي !

 

[أكرم التلاوي]

‏مرري كفّك على حزني يجِف
طاب نص الجرح
باقي .. ضمتين
ناظريني
واوعدك من قبل لا يرتد لك طرفك
أخِف !

‎

 

[أكرم التلاوي]

‏أنَا مانِي حزين
اكثر كثير من الحزِن هذا الشعور
كذا كنّي كنِت (جَنّه بربوَه)
صَابهَا وابِل قِساك
وآتت أُكلَهَا ضعفين (بُور) !

‎

 

[أكرم التلاوي]

شفتك وكنك تعبري من خلالي
وكذبت عيني بين واهم وشفتك
ما عاد غيرك باقيٍ في خيالي
كني فقدت الذاكره من عرفتك

 

[أكرم التلاوي]

كل ما أحاول أحفظِك عن ظهر (قلب)
ألقاني اعجز واحفظك في داخله !

 

[أكرم التلاوي]

ما عاد في صدري أغاني وألحان
نايي حطبته يوم جفّت شفاهي
لا قالوا انّي شاعرك إصرخي "كان"
شاعر واحبّه لين حَدّ التباهي
قولي عشقت الشعر في هيئة انسان
وراح القصيد اللي لفت انتباهي

 

[أكرم التلاوي]

تشربين الشاي؟
بعدك جالسة ؟
والليل مَيّش غُرّتَه بالصبح
وجفّ ريق الناي ؟
هو ظَل عندك من أمل ييجي
وهو من أول السَهرة حلف لك
"ربع ساعة وجاي!"