يتيم

[عبدالله صلال العساف]

احبتي جميعا اهديكم هذه القصيده آملا ان تحوز على اعجابكم وكنت قد نشرتها
في مجلة المراه اليوم في ملف وهج الشعبي الذي تشرف عليه الرائعه ميره القاسم

....( يتيم )
يتيم
والنوافذ وجهها مغْبرْ
والشارع عتيم
والستاير ماوراها رمش غالي...!
لو يداعبها النّسيم...؟
جيت أدوّر عن حنان ومالقيتك
احتظنّي هالفراغ المرتمي من دون بيتك
احتساك البعد قبلي..!
ومالقيت إلاّ هشيم
من بقايا احلام وآمال واماني
كانت اوراق ابْغصن حبٍ ذوى
من سخافات الخريف
وقلب أناني
انتميت إل..واحة اضلوعه ونفاني
ابلا نديم
للدروب الجرد
لحدود الشتا والبرد
للشاطي العتيم
جيت أسولف لك ورديت ابسكوتي ؟
كل هذا الصمت صوتي..!!
ومالقيتك
هالفراغ اليوم بيتك ؟
وجيت راجع مابديني
غير ليتي وغير ليتك
مالقيتك
وانت تدري ان مالقيتك
ايتسرّب كل هالشوق ابزواياي وأهيم
جيت غيم
وشتّتت ريحك فصولي
جيت أفلّك ياشراع البعد وأمضي..؟
من زمان وانا هذي الريح ارضي..!!
من فضولي
ومن سخافات الخرايط
كم ضحك هذا المكان اللي على شرْفتك يفضي
وماحكيت
تمتم الصمت ابزواياي وبكيت
ورد بالدرب اللي جابه
هاليتيم

عبدالله صلال العساف