(17)
...(سيد أسياد الأمم)....
[poem=font="traditional arabic,6,black,bold,normal" bkcolor="transparent" bkimage="" border="none,4,gray" type=2 line=1 align=center use=ex num="0,black"]
ما لقيت ابخل منَ الإعـراض عن مـدح الكريم=وما عرفت اكرم منَ الإحجام عن ذمّ اللئام
وانت يا سـيّد عـباد الله يا لـفـذّ العـظـيم=منت حي الله عظـيم وْ منت حي الله إمـــام
هـادي الأمّــه وقايد هديهـا الهدي الـقويم=سـيّـد اسـياد الأمـم والأنـبـيـا سـيْـد الأنــام
كرّمك ربي وصانك عن دنسهم يا لحشيم=واكْرَمَكْ باعظم رساله واصطفاك مْن الكرام
لك مقامك..واعتبارك..واحترامك يا لفخيم=ولك على كل المعالي والـعُــلا قـدْر وْمـقـام
مـا يوَفـّيـك الـكـلام ..وْلايترجـمـك الــكـليم=ويش ما قـلـنـا وقـلـنـا ما يوفـّيـك الكـــــلام
ياصفونك بالوفا..والصدق..والحسن التميم=وانت من حسنك تـتـمّم كلّ وصف ٍ ما يُـرام
فاضل ٍ..طاهر..عفيف النفس..مبرور ٍ..رحيم=عابد ٍ..زاهـد..شكور ٍ..صادق ٍ..شـهـم ٍ..هُمام
عالي الهمّه..رفيع الشان..بطـّاش ٍ..كظيم=ليـّـن الجـانب..شـديد الباس..مـغـوار ٍ..سِـمام
قـاهــر ٍ مـا تـقـهـر الاّ زمــرة ابليس الرجـيـم=وافي ٍ ما تـخـلـف الاّ هـقـوة عْـيـال الحــرام
كـايد ٍ ما أهونك عند الـمـواعظ يالحكيم=هـيّن ٍ مـا أكـودك عند الـتـهـاون بالـحـــــرام
ثابت ٍ ما يرهبك سهم المنايا والخصيم=مـرهـب ٍ ما ثبـّتـك غيـر الـتـصـدّي للسـهـام
تـنـدفع وسْـط الأعادي مثل طـعـنـه بالصـميـم=ما يريـبـك معـتـركهم..أو يخـيـفـك اِلْـتــِحَـام
اخترقت صـْفـوفهم واغديتـهـم جمع ٍ قسيم=ما تـقـول الاّ قـطيـع ذْيـاب باغـنـام ٍ نـيـام
شُـوفهم والسيف يدفعهم أمامك كالحطيم= كنهم من خـلف ظـهْـرك يدفـعـونك للأمـام
ما أحَد فيهم على كثـْر العدد روّح سليم=اللي ما هُـو من جنازاتك..أسـيرك يالحسام
ومـثـْلِ ما تذبح صناديد العرب وقت الصـديم=تذبح اعدائك بلا طعن..وتناحر..واصطدام
منهم اللي تذبحه بالمجد..والملك التخيم=ومنهم اللي تذبحه بالطيب..واحسان الوئام
اجتمع فيك..الكرم..والحلم..والبطش الوخيم=اجتماع الدّر..بالياقوت..والماس الـمُرام
بكْ صلابة ( موسى ) واصرار الأبي (نوح) الحليم=وبكْ فراسة سيّدي ( يعقوب ) واذْعَان الشيام
وبكْ طهر (مريم) وعفـّة (ابنها) البرَّّ الحميم=وبكْ دمـاثـةْ سـيْـدنا ( يحيى ) تغشـّـاه الســلام
وفيك من (يوسف ابن يعقوب) حسنه يالوسيم=وفيك من (داؤود) حسن الصوم واحسان القيام
وفيك إخلاص الكفاة العابدين اهل الرقيم=وانك ابلغ من بلغ في منطقه سقف الكلام
فيك مالا عين شافت وسْمعت إذن السليم= كامل ٍ ما ينقصك غير التباهي بالتمام
والذي سوّاك واحسن صورتك إنك عديم=وانّ تشبيهك بِمَنْ دونك من العالم حـرام
لكن انـتـه ما أحَـد فــوقـك سـوى رب الحـطـيـم=يـعنـي مجـبـور اوْصِـفِك بالأدنى من عـلْـو المـقـام
مثْلِ مـا ربي وصـف نـوره بمشـكاة الـعـتيم=أو كمـا شـبّه ضـيـاء الشـمس بسْـراج الظلام
سيدي : تالله ما مثلك..ولا فوقك..قويم=كملك ربي وزادك بالسماحه والقوام
تغـتـنم كلْ ما غـنمته من غنايم يالغـنيم=بالعطا..والطيب..والبذل..المضاهي للغمام
ما تخاف الفقر..أو تخشى مِنَ الجوع الأليم=كنك اللي يـبـتـغـي بالجوع تحصيل الطعام
ان عطيت اوفيت..ما تِمْسِك..ولا تذخر نعيم=وان مسكت..اوفيت بالإمساك أيام الصيام
تـتـقـي بخل العطايا..اتـقائك للجحيم=وتجتـنب شح المكارم..اجتـنابك للحرام
لو يعَـرْف البحْر كفّك ما ترقرق للنسيم=ولو يعَرْف النفط فضلك ما طلع بـارض الحرام
بكْ نباهي منجزات الغرب والشرق القديم=وبكْ نفاخر.. الأواخر.. والأواسط ..والقُدام
ما يضرّك نابح ٍ ينبح مِنِ كلاب الرجيم=دام قدرك فوق تـقــدير البشر عند السلام
وكان مدهشهم وجودك باللَّـحَـد وانت العظيم=فالدُّرر وسْط الصدف تحْـت الطحالب والركام
شرّف الله في ختامك أنبيائه يا لختيم=وشرّف الله أُمّتك حين اصطفاهم للختام
يكفي ان المدح في شخصك نقيصه يالتميم=ويكفي ان العجز عن مدحك مديحه والسلام[/poem]