درايش..

[منتهى القريش]

على بابك ..
علقت أنا اعيوني
في زحمة اغيابك
أخاف ينسوني

[منتهى القريش]

البارحه .. نامت عيوني
بس القلب ما نام
كلما يذكروني
فز الوجع يصرخ
يقول الوصل أوهام

[منتهى القريش]

حبيبي والكلام اللي
تكسر في حناجرنا .. ولا قلناه
غريبه تقوله الـ غيري
وانا تعبت مشاويري
ما بين أرجوك علمني
وبين ابعد .. يمكن حلمنا ننساه

[منتهى القريش]

أريد القى لي وطن
أجمع به شتاتي

أريد أفرح
ما بقى من حياتي

[منتهى القريش]

كني أشوف الأرصفه
عيون ذابت انتظار
وامطرت لهفه وحنين

الشوارع
بس مواجع
تشتعل فيني حطب
صمتها مثل الصخب
صخبها دمع وشجون

[منتهى القريش]

فز .. صحي حلمك
لا تنام
بلل ارموشك سهر
ادفن احزانك قهر
شوف ليلك م اطوله

تدري انك
لو انطفى فيك السؤال
صار صمتك اسئله

شوف عينك
عن يسارك
خاصمت أقصى يمينك
حاير(ن) بينك وبينك
تمشي .. تتعب
لا انت قادر توقف بنص الطريق
ولا انت عارف آخره من أوله

حقيبة العمر اللي راح
وفيها حزنك ..
لا انت قادر تتركه خلفك تروح
ولا انت قادر تحمله تتحمله ..

[منتهى القريش]

أنتظر
والثواني تحتضر
ربما طيفه يمر

[منتهى القريش]

غيب وارجع من جديد
خلي عيدي يصير عيد
انت تدري في غيابك
عرفت معنى الانتظار
عرفت معنى الاحتضار
ليلي عتمة .. صبحي عتمة
عميا صارت كل حياتي
ما ابصرت ضي النهار