درايش..

[منتهى القريش]

تعال
خذ باقي حنيني
روح عني ما أبيك
وحتى آنا ما أبيني
هو مني ولا منك ..
اختلط شكي ابـ يقيني
قولها وبكل صراحه
ما تبيني؟
ولا إنك .. تبغى تملاني كدر ..

[منتهى القريش]

وش أقول
والكلام الي اشتهيته..
ما لقيته
وما عرفت اشلون اقوله ..

[منتهى القريش]

الغياب ..
مو عذاب ..
شي أكبر ..
غصن يابس ..
كان في يوم أخضر ..
وانكسر ..

الجراح
مو ألم ونقول راح ..
شي أخطر ..
ذكريات .. ناس ..
رحلة من مواجع ..
بيوت .. أرصفة ..
زحمة شوارع ..
أفراح كانت ..
ثم صارت ..
أحزان فينا تنتحر ..

[منتهى القريش]

ما تعلمت اكره ولكن ..
اليوم أكره كل شي ..
يمكن لأن الأشياء عندي ..
اليوم صارت ..
ما تعني لي شي ..

[منتهى القريش]

رحت
أخذت الضي بيدينك
لجل عينك
بقت روحي مع العتمه
تعال وسدده دينك ..

عطني ما بقى مني
حنين الوقت بعثرني
أنام أتوسد ادموعي
ويلحفني .. صدى وينك؟

يموت الصمت بـ اشفافي
وجفني لو يكون غافي
يصحيني
واسألني .. أنا ويني؟
ألاقيني .. بنص الهم
مسافه بيني وبينك ..

على رمشي
تعبت أمشي
مشاوير القهر وحدي
تعال ولو تكون ضدي
خذ ادموعي قرابينك ..

[منتهى القريش]

(وترحل)
وانا أذبل
وثوب الفرح يتبدل
وتاخذني مشاويري ..
تلبسني مقاديري
ثياب الهم
وأتبسم
واغني لك ..
(مقادير يا قلب العنا) وينك ..

على صوتي.. يموت اسمك
ولا همك
وجع يسكن بتفكيري
يهز النوم في جفني
ويحضني ..
سهر محموم
وكلما غمضت عيني
يفز النوم ..
ياخذني الـ عناوينك ..
عنا .. وينك؟

[منتهى القريش]

المشاعر
كذبه يمكن!
ولا لوحه ..
ملونه بـ احساس شاعر

الدفاتر
أوراق .. ماضي .. ذكريات
اسم حي .. وإسم مات
اللي سافر .. واللي أقفى ..
واللي بيته صار منفى
والـ حمل حزنه على كتفه وهاجر

النواظر
عيون كانت ..
حتى في الظلمه تشوف..
ولما رمش الليل مات ..
صارت الدنيا كئيبه ..
فيها خوف وفيها ريبه ..
وأيقنت .. هـ الليل كافر

[منتهى القريش]

ما أبيك
عزة النفس اللي فيني ما تبيك
بس جيت أسأل .. كيف حالك؟
تكفى طمني عليك ..

[منتهى القريش]

غبت ..
وما تركت إلا الحنين
وحلم مكسور الجناح
إنت قاسي؟ ولا ناسي؟
ما أظن .. يسعدك نزف الجراح ..

وين وعدك
(لا تخافي .. دللي كل الأماني)
وهذا صدك ..
في لهيب الإنتظار ..
كم بكيته .. كم شكيته .. كم رماني

تعال
والله مشتاقة اشوفك ..
مرني لحظه ..
رجع الوقت اللي راح
مرة وحدة لو تمر ..
يشتعل شوقي جمر ..
ومن كثر ما كنت اعاني ..
يمكن أفرح بك ثواني ..

[منتهى القريش]

(لسه فاكر)
ولا إنك بعد هجرك قد نسيت ..

[منتهى القريش]

حبست آهاتي
في قفص صدري.. عصافير
من كثر ما ضاق بيها
تبغى لو لحظه تطير ..

[منتهى القريش]

تذكرتك
ومرتني سحابة هم ..

[منتهى القريش]

قبل احبك ..
كنت مرتاحة كثير ..
بعد حبك
أعتقد ماني بخير ..

[منتهى القريش]

بـ اعتذر لك عن حنيني
لو يفيد الإعتذار
بـ اعتذر عن كل لحظه
ذوبتني إنتظار
بـ اعتذر لك عن جراحي
وليلي اللي يبقى صاحي
يزعجه صمت النهار ..
بـ اعتذر عن كل ذكرى
كل فكره
رادوتني وكنت فيها
ما أبيها..
راح أحاول إني أنسى
عصفور في ايديني حبسته
فتحت شباكي وطار ..

[منتهى القريش]

ليه تقسى
وآنا أنسى
قسوتك واغفر واسامح ..

[منتهى القريش]

ليه طعم الظلم مُر؟ ..

[منتهى القريش]

لو قسيت
لو جحدت العشرة في يوم ونسيت
يبقى لك في داخلي أجمل شعور

[منتهى القريش]

ليه بس
تتهمني ثم تروح ..
عطني فرصه
أذوب البرد بكلامي
ولا اقول لك ..
روح الله يحفظك
ان كان يسعدك اتهامي ..

[منتهى القريش]

تدري شنهو يجرحنا؟
إذا افرحنا
ولا به من يشاركنا
شحيح الفرح .. بس احنا
نبي نتقاسمه ونضحك
وندفن به مواجعنا ..

[منتهى القريش]

على طاري الأرق والهم ويا الضيق
وش اخبار السهر وياك
وش اخبارها اعيونك ..
إذا طيفي في عز الليل مر بيها..

[منتهى القريش]

طيب اسأل
وش بقى غير السؤال؟
بس تخيل
شلون يفرحني سؤالك
رغم قبح الكون وهمومي وحزني
تصير دنياي اجمل
واعيشك ظل كذبه .. كثير عذبه
واعيش وصلك لو مجرد احتمال ..

[منتهى القريش]

وش كثر هالليل معتم
يزروني طيفك ملامح ذكريات
أنام يمكن لحظه أحلم
واصحى من حلمي على صوت الألم
آتبعثر .. وآتكدر ..
أضيع في سكة وهم
وارجع أجمعني شتات ..

[منتهى القريش]

البارحه .. ضاق الكون فيني
واشتهى رمشي ينام
تلحفت عيني بعيني
قلت ادفيها حرام ..
تحس في رجفة حنيني
بردها نار وسلام ..

[منتهى القريش]

بعثره
والكلام اللي اقوله ..
بكل سهوله!
بعثره ..

محبره..
واوراق صفرا مكسره
والكلام الـ باقي فيني
ينكسر في داخلي
شي يشبه ..
صوت فقد وغرغره

أعذره ..
ليش قلبي م اعذره
إنت تعرف ..
إني أؤمن بـ (العفو عند المقدره)
كل شي ممكن أسامح واغفره
إلا صدك .. لا وربي م اقدره ..

(ع اللي جرى)
جيت أغنيها وادندن
ما مداني أبتديها..
اختنقت
انتحر فيني الكلام ..
صار صوتي مقبره ..

[منتهى القريش]

واذا ليل الحزن عدى
ولا ردوا
كيف نسلف البسمه شفايفنا؟

واذا شفنا ..
ملامحهم
بحضن الفرح مرتابه
بس احنا..
جمرة شوقهم بالروح
على حبل الجفا تلعب وتحرقنا

واذا عشنا
نتاني ردة الغياب
حلم يكبر
طفل مجبر ..
يتربى بداخلنا

وكلما ضاقت اذنوبه ..
على ثوبه
حلف يرحل ويتركنا

واذا طحنا
وخانتنا خطاوينا
يصير ترابنا يوجع
نطيح .. نقوم ..
نتوجع ولا نركع
ننسانا ..
تجحدنا ملامحنا

[منتهى القريش]

واذا نمنا
نتوسد مدامعنا
وجا بكره
وصحانا ألم ذكرى
وكان الحزن ثالثنا ..

واذا يعني تكلمنا
وقلنا ما بداخلنا ..
ولا ارتحنا
غريبه هالحكي يجرح
وحتى الصمت يفضحنا

واذا ضجت سوالفنا ..
ورتلنا مشاعرنا
بحضن الليل ندفنها
كأن الليل متعمد
يذر الملح .. فوق الجرح
ويصحي كل مواجعنا

واذا احنا تعودنا
نقول الصدق
وما به من يصدقنا

واذا مره
مع انفسنا تصالحنا
وتبسمنا
نلاقي دموعنا تنزف
بس تبغى تذكرنا
بآلام الفقد والصد والهجران
تريد الفرح ينسانا ..
ولا يبقى بداخلنا
سوى حسرة تغلف كل مشاعرنا

[منتهى القريش]

عادي تروح
عادي تجدد هـ الألم

عادي تراجع حسبتك
وتشوف من فينا انظلم

دام الله كاتب هـ الفراق
راح ارضى بلي لي انقسم

انت الـ بديت
انت الي على هجري نويت
لك عين تشره تتهم؟

وتقول لي متغيره!
تعتب علي
وبصبري آنا أحتويك
روح ما أبيك
غصبن علي اقولها
ما ريد روحي تنظلم ..

[منتهى القريش]

أحب أكتب قصايد شوق
واعلقها على بابك
واعشق غربتي وياك
أحب ضعفي وانا يمك
أحس عمري اشكثر يصغر
أحس اللحظه تتغير
تصير أحلى تصير أقصر
وكلمات العشق تكبر ..

[منتهى القريش]

مو غريبه .. تبقى وحدك
والـ معك في يوم كان
مو غريبه يصير ضدك
الغريبه..
إنهم وبكل شراسه
يدنسوا فيك البياض
والمشاعر ..م انت شاعر
استباحوها وراحوا
وبيحوا بالغدر سدك ..

[منتهى القريش]

لا تندم ع اللي راح
الوفا ما هو خطيه
لا يا قلبي لا اتألم
لا ولا تشره عليا
كنت احبهم .. إيه أحبهم
مو بـ ايديا
إنهم خانوا شعوري
ما دريت
إن حبهم في حياتي
للأسف أكبر خطيه ..

[منتهى القريش]

كنت احس ..
إنهم.. يشتروا ويبيعوا فيني
رغم هذا
كانوا أغلى .. كانوا أحلى
شي شلته في عيوني
نسيت نفسي لـ اجلهم
حتى آنا ما أبيني ..
بعد هذا ..
تسأليني يا طعوني!
ليه راحوا ما خذوني؟

[منتهى القريش]

جيت من أقسى مسافات الغياب
احتمال ..
إني أكون أو لا أكون
جيت أدور لي عيون
(قد أرى غيرك فيها)
ربما في غيابك
أشوف غيرك
بس عيني ..
يشهد الله حاولت
بس ما قدرت تخون

[منتهى القريش]

البارحه
تواعدنا أنا والفرح
نتبسم
إذا أشرق علينا صبح
نام الليل
تأخرنا على الموعد
صحينا ..
في تمام الفاجعه إلا جرح ..

[منتهى القريش]

إنت وين؟
انتظرتك ..
من ذكرتك..
ضاقت الدنيا الوسيعه
وانطفى فيني الحنين
كان في صدري كلام
كان ودي افـ يوم اقوله
وازرع ابـ صدرك ضياعي
واشتكي له
ما بقى غير التياعي
وليلة الحزن الطويله
انت وين؟
صوتك اللي من رحلت
داخلي يعبر صداه
(سألتك حبيبي
لـ وين رايحين)

[منتهى القريش]

مو ألم إللي أحسه
شي أكبر
لا ولا لحظة ندم ..
يمكن أخطر
الـ أحسه
يشبه الموت البطئ
شي فيني
يطيح من قلبي لـ عيني
وايتكسر ..

[منتهى القريش]

ما به أحد
حتى الكلام ..
صار متوجس وأصفر

هـ المدينه
ارتدت ثوب الغياب
هاجرتنا .. ما تبينا
وكل شي فيها تغير

الشوارع
أرصفتها .. اشقد حزينه
يمرها صوت الحنين
والمدى ..
صمته جنون
كلما له يصير أبعد
كلما له يصير أصغر

[منتهى القريش]

بدري ..صحا هـ الليل
مثل كل الـ يحبونه
قعد يرسم .. على اجفونه
بقايا سكره مجنونه

حلم صوتك؟
ولا انه..
مثل خمر الـ يشربونه

ثملنا به .. أنا وروحي
وادمناه
كيف نعيش من دونه؟

على فكره
إذا صوتك
مجرد حلم أو سكره
أريد الصبح يتأخر
أريد اثمل بعد أكثر
يجي بكره على هونه

مجنونه؟
أنا فعلاً .. بعد ما لمني صوتك
تريد الصدق؟
حقيقي صرت مجنونه ..

[منتهى القريش]

مدري اشفيني
أحس اني مو معي
خذني مني ما أبيني
لا تقول لي إرجعي ..

[منتهى القريش]

وش الـ جابك؟

كانت ليله مشؤومه
كان الـ بدر فرحان
أبد ما بان
إنك جاي تقتلني
وتقبرني مع الباقي من احبابك ..

[منتهى القريش]

فيني شي
مدري شنهو
بس احس انه وجع

مثل غصن
هزه الإعصار لكن
مات واقف ما ركع

جاد دمعي.. من عيوني
ثم هما
مثل سيل(ن)
فوق وجناتي اندفع ..

[منتهى القريش]

وش اخبار الحنين ودفتر التذكار
كتبت اشعار .. قرأت اشعار؟
وش اخباري بعد ما رحت
كل شي مات بغيابك
حلمي ما بعد يكمل ..
لا تسأل ..
خطاوينا الـ مشيناها ..
ماتت بـ اول المشوار ..

[منتهى القريش]

من زمان
كانت الأيام بيضا
ما يعكرها سواد

كنا لما ..
نضيع ترفضنا المنافي
بكل ديره ..
ربما نلقى بلاد

كانت أنوار الشوارع
تستلف ضيها من افراح القلوب
كنا نمشي في اتجاه الريح ..
نعشق ما نتوب
كانت اللحظات أحلى
كانت أغلى
كنا نضحك .. نبتسم .. رغم الألم
كان يجمعنا التصافي .. بلا تجافي
فوق تربه .. بوجه غربه .. أينعت حب ووداد

[منتهى القريش]

لا توهقني بغيابك
تعودت روحي عليك

شوف روحي عند بابك
تنتظر لمسة يديك

[منتهى القريش]

تجي وتروح
وقلبي ع العهد باقي
وفا مقبور وسط اجروح

ما بين الصمت وبين البوح
تتغرب انا روحي ..
تعذبني .. تجرحني
واسامحها ..
حيث ان الوفا مسموح ..

[منتهى القريش]

مرني طيفك
استفز الحزن فيني
ثم راح

مرني صوتك
هيض ادموعي بعيني
واستراح

ما أعوفك
لا ولا يبرد حنيني
مهما تنزفني الجراح

[منتهى القريش]

محتاجة لـ شوية صبر
يعلمني على النسيان ..

محتاجة أتنفس صدر
ما مرته أحزان ..

محتاجة أزرع هـ العمر
ضحكة غصن ريان ..

[منتهى القريش]

علمني على القسوه
علمني كيف انساك

بالله كيف افرح
وانت الذي اقفيت
واخذت الفرح وياك

[منتهى القريش]

لو بيدي
ما تركت الحزن لحظه يحتويك

لو بيدي
كنت أزرع هالثواني
فرحة تكبر بين ايديك

لو بيدي
اختصر كل المسافه
انتهي بك وابتديك ..

[منتهى القريش]

كل لحظه .. في غيابك
عمر يكبر بي حنين

كل ليله من عذابك
يزورني طيفك جنون

[منتهى القريش]

يسألوني..
وين راح؟
ما ألاقي أي جواب

تكبر بروحي الجراح
واغرق بلجة عذاب ..

[منتهى القريش]

بالفرح نحلم
بس تصحينا الدموع

وانتوهم
الدروب الي خذتهم
فيها سكه للرجوع

[منتهى القريش]

البارحه
شفت طيفك في منامي
قلت له وكلي ألم
بالله وصل له سلامي ..

[منتهى القريش]

البارحه
مروا على بالي .. كثير أحباب
راحوا وتناسوني

كثر همي
كثر ما عاشوا ابدمي
كثر ما قلت:
وين راحوا ..
كم تانيت ولا جوني

مرتني أساميهم
أرق يلعب على اجفوني

تلحفت انتظاري هم
غفى جرحي..
لكن ما غفت عيني

نام الليل
تانيت الفجر يصحى
تبسم لي
أثاري الهم
على بابه يتانيني

فتحت الباب
اسأل صمتي المغبون
متى يردون؟
رجع صوتي
سؤال أثقل على امتوني
الـ راحوا
ليش راحوا وخلوني؟

[منتهى القريش]

عجزت أجني
حصاد الحب من قلبك
عجزت آقول انا احبك
وحبك حيل عذبني

فـ امان الجرح والذكرى
انا بـ ابعد لجل ترتاح
بس بكره
إذا حنيت ومر طيفي على بالك
أمانه بخير تذكرني

على فكره
برغم انا تفارقنا وماتت كل سوالفنا
كون بخير .. ترى بعدك تهمني ..

[منتهى القريش]

ناديت
تعب صوتي من الندا
لا انتَ جيت
ولا رد الصدى ..

[منتهى القريش]

هذا المسا شاحب
معتم وما به ضي

أشرب فناجيل القهر
واغرق بشربة مي

من يوم صوته اختفى
وآنا احتمي بـ الفي

جمرات وصله طفن
شب الوصل يا خي

[منتهى القريش]

ليه تجافيني
يكفي عيني
من جفاها النوم ما جاها مطر

ما أبيني
حايره بيني وبيني
كن صدري نار واحزاني جمر

أريد صدرك يحتويني
أريد عيني
من تشوفك.. ينتحر بيها السهر

[منتهى القريش]

م انتهينا
ولا بدت قصه حزينه
إسمها .. ليل الفراق

[منتهى القريش]

كتبت اسمك
على الباقي من اسنيني
حنيني لك ..
دمعاتي .. ضحكاتي
سهر عيني

تخليني؟
كيف تقدر تخليني!
وانا روحك ..
تلم حزني .. تواسيني

وحشني صدرك المنفى
يلمني صوتك وأغفى
أريد أدفى .. تدفيني؟

على عيني
ظروفك .. قسوتك .. بُعدك
كل هذا على عيني

أنا عمري إلك فدوه
فداك افـ مُره وحلوه
بعد هذا ..
تسألني .. تحبيني؟

[منتهى القريش]

ما نسيتك
كلما مريت في ذيك الحواري
أشعل أنفاسي على بابك حنين

أسمعك .. تسألني عني
أذكر اني
كنت ألعب ..
لعبة الترحال وابعد
ولما أرجع
كنت تسأل ..
وين كنتي .. ليه غبتي ما تجين

كنت أسولف
بس ما تسمع كلامي
كنت غايب إلا عني
واذكر اني
كنت أسابق لهفتي
واختصرها بكلمتين ..

ما أحبك .. روح عني
كنت تضحك .. تحتضني
واسمعك تهمس بـ إذني
حبيبتي ..
أكيد كنتي تمزحين

وافترقنا
مثل باقي العاشقين
ما بقى معنا لـ بكره
غير ذكرى
تشعل أنفاس الحنين ..

[منتهى القريش]

الصبح مات ..
م انت خايف م الظلام؟
م انت خايف من جراحك
تحتضن شهقة صباحك؟
وتبقى وحدك
بين عتمه وليل ظلمه
والفجر اللي تبعثر
ما يلاقي من يلمه ..

[منتهى القريش]

(مرينا بيكم حمد)
لا قطار الليل أبطى في المسير
ولا عرفنا الـ وين ياخذنا المصير
والحمامات اللي بكت لـ فراقكم
مكسورة الجنحان ما تقوى تطير

كبرت الأحزان بينا
من توادعنا ومشينا
ويش خذينا م الفراق
يا حبايب ويش خذينا
غير هم ..
واسئله حايره بليا إجابه
يا ترى بعد الفراق
تمر ذكرانا عليهم
يا ترى شوق اللي بيهم
يحترينا مثل م احنا نحتريهم
ويذكرونا بس بخير؟

[منتهى القريش]

يـ النويت تروح وما تترك أثر
ما بقى منك معي
غير ذكرى
ليل واحزان
ومواني
وفرحه صارت في غيابك تحتضر ..

[منتهى القريش]

ويهطل وابل اهمومي
على نومي
أرق نعسان

وأرسم لوحة أحلامي
حزن دامي
شوارع .. أرصفه .. بيبان ..

[منتهى القريش]

خلاص بـ اسكت
ما عاد ينفع حكي
خل الكلام يموت داخلنا
جيت اشتكي
جف الحكي
وماتت سوالفنا
مدري الزمن تغير
ولا .. حنا الـ تغيرنا ..

[منتهى القريش]

أحتريك
كثر خوفي ..
كثر ما تنزفني حروفي
في غيابك
روحي تسألني عليك ..

ما أبيك
لما ترجع ..
تسأل: اش سوت ظروفي
وانت غايب
ما بقى بعيني حبايب
أبتدي بك انت وحدك
وارجع انهي كل حنيني
واقول اني في غيابك
ما أبيني
ومن أشوفك ..
أكذب إحساسي واقول:
روح .. إبعد
تصدق إني ما أبيك؟

[منتهى القريش]

اتصلت..
أريد اسأل عن حنينك
لهفتك .. رعشة يدينك
وكان بارد اتصالي ..
(إن الهاتف المطلوب)
كان صوت الشوق عالي ..
وانكسر شي فيني ..
لهفتي .. شوقي .. حنيني

[منتهى القريش]

وين رحت؟
وين وداك الغياب؟
تدري إني
أعيش بعدك في عذاب؟

[منتهى القريش]

طيب اسأل..
ويش سوى بي غيابك
جامل إحساسي وقول إني وحشتك
تدري إني
راح أرضى .. بكل شي حتى سرابك! ..

[منتهى القريش]

في صمتنا
وايد حكي م انقال
كل الخطاوي اثقال
تحرض على التغريب
تعال خل انغيب
في عتمة الترحال

[منتهى القريش]

مشينا بسكة الأغراب
تتلفت خطاوينا..
ولا انسينا
ليالي سُهد ماضينا

وش فينا!
للحين نتذكر سوالفهم
نحن إلهم
بالحسره نداوينا ..

ترى يا ليل
من شدوا .. ما ردوا
تعب نمشي .. ولا ندري
لأي سكه .. تودينا خطاوينا

[منتهى القريش]

يكذبون
لو يقولو ..
يعرفوا معنى المحبه
يعرفون
إن الوفا بقلوبهم
إما خدعه .. ولا كذبه ..

[منتهى القريش]

سولف لي
عن اهمومك
أريد أغرق أنا فيها
أريد أتركني وانساني
على رمضة شواطيها ..

[منتهى القريش]

فقدت الروح بـ اغيابك
حنينك
رجفة ايدينك
سؤالك عني .. تخمينك

أدور في الـ يمروني
يناظرهم طرف عيني
من الغربه
أشوف عينك
تسألني أنا وينك

حروف اسمك
على الساني
بيتي .. داري .. عنواني
تهت آنا وادورني
في زحمة عناوينك

ترف عينك؟
تراني أذكرك دايم
غريبه .. ما ترف عينك!

[منتهى القريش]

عمت عيني
صرت أشوف كل الناس
ملامح فيها من وجهك
وحتى اسمك .. بيه آنا أناديني!

[منتهى القريش]

كيف أخونك
وكل لحظه تمر دونك
احس فيها بالضياع

[منتهى القريش]

أحبك حب يفوق الوصف والتعليل والتبرير
أحبك حب ما له حد
أحبك حب خلاني .. أشوف الدنيا لسه بخير
أحبك حب .. ما حبه أحد قبلي
ولا بعدي
ولو كل شي يصير ضدي
فداك الروح يا بعدي
ومع هذا ..
بعد عمري .. يا أجمل من سكن صدري
سامحني على التقصير

[منتهى القريش]

ما قصدت أكتب على الجدران إسمك
لا ولا أدخل حواري .. فيها ريحه من هواك
يوم جيت
لقيت في ايديني بقايا
من طباشير الجدار
لقيت في عيني شظايا
من حسافه وانتظار
لقيت نفسي.. من دون ما أدري معاك

[منتهى القريش]

كل صباح يمر
من غير صوتك
معتم وأسود وداكن

[منتهى القريش]

كلما حاولت أغفى
يموت في صدري الكلام
أشيعه بـ ادموع عيني
وادفنه وسط الظلام

[منتهى القريش]

للأمانه
حتى لو مرني طيفك
أعتبرها لك خيانه ..

[منتهى القريش]

رد لي ليل وأرق
مشتهي رمشي ينام
رد لي إشفافي ورق
باقي في صدري كلام
تعبت وحدي أسهرك
وانت في غيك تنام

[منتهى القريش]

أنا كنت أحسبك
في قلبي الأوفى
ألف وسفه
طلعت الخاين الغدار
حسبت اني
بـ ليل البرد بك بـ ادفى
وبالصدفه عرفت انك رماد ونار
وآنا ظنيت في يوم انك
قلب دافي
ويوم هبت عليه من الهوى نسمه
اتضح انه بقايا اغبار

[منتهى القريش]

لأنك ظالم وكذاب
دعيت ربي يسد ابـ وجهك الأبواب
دعيت عليك من قلبي
واخاف ابـ دعوتي تنصاب
عسى ربي يسامحني
عساها دعوتي تخطيك
أنا ما ابيك
تشرب من حمم كاسي
مصيبة فقدة الأحباب

[منتهى القريش]

اريد امسح
ملامح منك كذابه
واذا دق الحنين الباب
اقول كانوا هنا أحباب
جافوني وخلوني
يتيمه ضايعه ابـ غابه

[منتهى القريش]

يا الراحلين
يا التاركين أصواتكم
في صمتنا
تعزف ضجيج أرواحنا
كنتوا هنا
ردوا لنا لو في الحلم..
ولو ما بغيتوا ترجعوا
ردوا لنا أصواتنا ..

[منتهى القريش]

(أنا عندي حنين)
للراحلين
اللي بقوا بقلوبنا يتمرجحوا
ما بين شكنا واليقين
فيني حنين
لكل العيون
اللي بكت واللي شكت
من غدرها ارموش السنين

بـ اعزف لمين هذا الحنين
واوتار صوتي افـ بحته
تعزف على صدر الورق
حزن وأرق
واسمعها في روحي ندا
يا بحة الناي الحزين

فيني حنين
يشبه حنين الكادحين المُتعبين
الـ يسهروا الـ ينطروا باكر يجي
بعد التعب
تغني عصافير الفرح
بين البيادر والغصون

[منتهى القريش]

أتخيلك
في غناوي الراحلين
في بحة الناي الحزين
في وجوه العابرين
لما تمر أصواتهم زحمة حنين
واكذب على نفسي واقول:
م اشتقت لك

أتخيلك
في قلوب العاشقين
لو يلتقوا بعد الغياب
اللي خذاهم من سنين
رجفة حنين
في أيادي الكادحين المتعبين
تربه وطين
تنبت سنابلهم حنين
يكبر الك

[منتهى القريش]

لي الله
ما سكت جرحي وانت تنام؟
فـ امان الجرح والذكرى
عسى الله يسهل ادروبك
عسى ثوب الفرح ثوبك
وحق اسرافك افـ ظلمي
عساك افـ يوم ما تنضام

[منتهى القريش]

انا ماني على خبرك
ولا عاد السهر يوقف
على أبواب ليلاتي
بعد ما رحت
منو اسهر له واحاتي
منو يطمن عيون الشوق
اذا ضاعت بنظراتي

فقدت البحر والمرسى
بعد ما كنت مرساتي
غيابك حيل بعثرني
غريبه كيف
ما حسيت بمأساتي

[منتهى القريش]

بذمتك
ما اشتاقت اذنك لصوتي؟
آنا أتعبني سكوتي

[منتهى القريش]

صباح اللي
صحا من النوم
ودفن بوسادته حلمه
صباح اللي
تخيل واقعه أجمل
لقاه اثقل
وزاده هم على همه

[منتهى القريش]

مثل كذبه
يمر طيفك
يسولف مع سهر ليلي وانفاسي
يشد رمشي مع انعاسي
ويلعب به

[منتهى القريش]

المدينه
شاحبه صارت حزينه
ما تجينا
يا ابتسامات اللي راحوا
ليه صرتي
حتى كذبه ما تجينا

[منتهى القريش]

كلما جيت أكتب
ألقى حبري ينزف اسمك ،،،

[منتهى القريش]

وانا وحدي
كثير أحيان أكون ضدي..

[منتهى القريش]

الرسايل
في غيابك
دموع .. صارت حبر سايل

[منتهى القريش]

كل صوت غير صوتك يمر في سمعي نشاز

[منتهى القريش]

حكايتنا الـ بطلها إنت
بـ اكتبها بحبر داكن
واسميها (رحيل الخاين الكذاب)
بـ ارسم فيها أحلامي
وعودك فرحة أيامي
وطن منفى حنين ووحشة الغياب

[منتهى القريش]

يا عطرهم
يا ريحة الأحباب يا باقي أثرهم
تكفى خل يبرد حنيني
كلما أنسى واصدهم
ألقى بـ ثيابي بقايا
من عيون اللي خذوني
ليتهم قبل ما يروحوا نسوني

[منتهى القريش]

الزمن يمتحنا
ياخذ احلى الأمنيات
وانتندم نبكي حسره ع اللي فات
بكره ننسى اللي جرحنا
بكره يتجدد أملنا
بكره نضحك
نقول ماضي كان حي
وفينا مات

[منتهى القريش]

في غيابك
المسا معتم وفاتر
والحزن سافِر ما يستر حنيني
من الآخر
أريد أكفر ابـ حبك
واستغفر ادموع الـ على هجرك بكوني

[منتهى القريش]

الطريق اللي أخذنا للـ الحنين اشقد طويل

[منتهى القريش]

صمت الحزن عالي
ولا ذي ادموعي
ضجت على اغيابك
ميت وانت الحي
وسط الحشا مدفون
كلما يهب طاريك
الحزن صار اعيون
تمطر عطش مغبون
ما بلل اترابك

[منتهى القريش]

أنادي لك في أحلامي
ويرجع لي صدى اسكوتي
أنا من كثر الندا مليت
أخاف الصمت يفضحني
واصحى فاقده صوتي ..

[منتهى القريش]

عادي لو نخدع ألمنا
ابـ ضحكه مُره أو حتى نبتسم
مو يقولوا:
الطير يرقص وهو يذبحه الألم

[منتهى القريش]

تعلمنا من الغربه
كثير أشياء
ما كنا أبد في يوم نعرفها
وحتى نوتة الأحزان
تعلمنا
ندوزنها ونعزفها
نغني جرحنا بـ اسكات
نقول أن الوطن راجع
بعد ما مات
تعلمنا
كيف ابـ صمتنا ندفن مواجعنا
نداريها بداخلنا وننزفها

[منتهى القريش]

ليت لي قلب ثاني
بيه أفرح .. بيه أنسى
ليت لي فكر وأناني
أقدر إني بيه أقسى

[منتهى القريش]

من يغيب؟
غير جاحد
ولا واحد
ضايع ابـ زحمة ظروفه
يدفن الغربه بـ خوفه
والدروب
معتمه ما يدري عنها
مثل طفله
غادرت قسراً وطنها
وخاب ظنها
لما صاحت وين أهلي؟
ما لقت إلها مُجيب

[منتهى القريش]

ضج الحكي
وافـ صمتنا جف الكلام
صرنا ننام
نتوسد أشباح الغياب
واحلامنا
مثل الرصيف الممتلي
زحمه وناس
شارع طويل
ووجوه يسرقها الظلام
عميا وتتحسس سراب

[منتهى القريش]

السهر
عتمه وقهر
في قلوب المتعبين
يحبسوا جوا الصدر
شوق واحزان وصور
من بقايا الغايبين

[منتهى القريش]

أهديتني
حبر وقلم
لما تروح
أرسم بهم
لوحة ألم
في غيبتك
جف الحبر
كيف ارسمك
كذبه وإحساسي وهم؟
ولا بقايا من حلم؟
خذ دفتري
بعثر مع الريح الورق
ما عاد ينفعني القلم

[منتهى القريش]

حنيني لك
دموع أغراب
إذا حنوا الـ منازلهم
شعور أيتام
إذا اشتاقوا الـ حضن أمهم
حنيني لك
عصافير وضيعوا عشهم
قلت أحبسهم ابـ صدري
عيا صبري يحبسهم

[منتهى القريش]

ويش اخباري بعد فرقاك
أنام أغمض اعيوني
حلم ألقاك
ويصرخ واقع أحلامي
لا تنامي
أفز أصحى على بحة مواويلك
واغني لك
(عودت عيني على رؤياك)

[منتهى القريش]

يـ الراحلين
البارحه أطيافكم كانت معي
كم بارحه مرت علي
ورمش الحنين
ينزف وجع من مدمعي
كلما أمر بـ ادروبكم
شوقي لكم
يصرخ ندم في خطوتي
صمت وصدى في مسمعي
ما قلت لك لا ترجعي؟
لا ترجعي

[منتهى القريش]

الغريب
اللي ضاعت خطوته وسط الزحام
اللي نام
يحلم ابـ ضحكة وطن
وما لقى الـ صمته كلام
الـ رسم حزنه منافي
ولون ادموعه سلام
يحضن الغربه ويناااااام

[منتهى القريش]

تقدر تخون
اللي فتح صدره وطن
ودار المنافي كلها
وما ضيعك
أرسى مراكب غربته
ما بين رمشك والعيون؟

[منتهى القريش]

مر من العمر
ثمان اجروح أو أكثر
وانا للحين
كلما مرني طيفك
أسوي له حفل تأبين

[منتهى القريش]

على الأبواب
حنين أحباب
بقايا سهرة البارح
شموع وضيها مرتاب
وانا وحدي
هنا أحرس محبتهم
أطفي الليل بعيوني
أنيمني أرق يفرح بجيتهم
واصحيني صباح الخير
بقايا من حلم كذاب

[منتهى القريش]

في عيون الليل تتمرجح ظنوني
وفي عيوني
تنطفي ابـ روحي صباحات الوجع
ما رجع؟
السؤال الـ ضاع في زحمة حنيني
واسمع ام كلثوم تصدح في خيالي
(كلموني تاني عنك فكروني)
وانسى إني ما نسيتك
ارجع أسألني ابحسره
واعاتب ادموع الـ بكوني
ليه عنك وانت غايب يسألوني

[منتهى القريش]

اذا ماتت أمانينا
وحسينا الكلام اصغر
من اللي ما بعد ينقال
(كيف الحال؟)
سؤال اصفر
نصل خنجر
يصحي ليل ماضينا
ويعزف جرحنا موال

[منتهى القريش]

المكان اللي
مر طيفك فيه واقفى
كان حافل بالحنين
صوتك وهمسك
ذكرياتك .. وعودك
اسئله تنعى رحيلك
والبقى
افـ راحوا لـ وين؟

[منتهى القريش]

يـ الغيبتك
حطت على صدري حزن
مثل الحمامه
اللي اكسروا جنحانها
صعبه تطير

[منتهى القريش]

تريد جرحك يلتئم؟
ابتسم
اضحك ابـ زحمة دموعك
غن .. ارقص للألم