درايش..

[منتهى القريش]

صباح العيد
واطياف الـ غابوا بزحمة الأيام
صباح العيد
ولا باقي هنا معنا
سوى فرحة .. سوى غصة
تهدهد لوعة الفرقا
توقف في حناجرنا تمرمرنا
لا تنزل ولا ترقا
تمر اطيافهم نفرح
وتتلاشى تصير اوهام ..

[منتهى القريش]

صباح العيد
وانا ادور على صوتك بأعماقي
هنا باقي
صباح العيد
وانا ادور على طيفك بأوراقي
ولا الاقي .. سوى همي
حنيني لك يبعثرني
يجمع ما بقى مني ..
يرسم لوعة اشواقي

[منتهى القريش]

صباح العيد
رحت لـ امي أعايدها
واسألها
أخويا عايدك يمه؟
درات وجهها عني .. تعاتبني

تكسر صوتها حسيت
قالت لي..
جا طيفه وكلمني
يقول يمه ..
سمعت طارق بيتزوج
منهو راح يخطب له؟
أريج تخرجت يمه؟
وشهودي ..
بعدها حيل تشبهني؟

وغصيت بـ حنيني لك
كرهت العيد وطاري العيد
حيث اسمه
ارتبط بـ اغيابك الـ طول
كذا صارت
تمر أعيادنا حسرات
اشكثر تكبر وتوجعني

صباح الهم
صباح العيد يا يمه ..
والذكرى الـ تكدرني

[منتهى القريش]

عشان اعيش
راح احترف ..
لعبة التطنيش

[منتهى القريش]

النوايا..
شك أقرب لليقين
تتضح لو بعد حين

[منتهى القريش]

أكيد تعرف
شنهو يعني
دمعة المظلوم .. لما تصرخ داخله

تشتعل به ..
تنطفي به
أحزان
دهشه
اسئله

ما يحس ابـ عذابه ..
إلا ثيابه
يموت ما حي(ن) درى به
تايه .. وضايع .. حزين
ينزف ادموعه أنين ..
ليته يعرف .. آخره من أوله ..

[منتهى القريش]

انتظرتك ..
وانتثر شوقي مواسم من عذاب
الله أكبر ..
كيف نصبر
كيف نقدر
نحتمل جرح الغياب

[منتهى القريش]

يا ثواني الإنتظار ..
ليش أصبحتي ثقيله
علميه ..
اشلون فـ اغيابه
تصبح الليله ممله ..
معتمه
وجداً طويله