درايش..

[منتهى القريش]

في غيابك
يزيد شوقي لك واحن
أدورك في وجوه العابرين
أسمع ابـ روحي حنين
لك يهاجر
وابقى وحدي
كل وجه يصير منفى
وغربتي تصبح وطن

[منتهى القريش]

في غيابك
احاول اتنفس صدر
يضيق صبري
واحس هالعالم صغير
يصير في اعيوني قبر

[منتهى القريش]

غيابك
يستفز ساعتي
يحرق أعصاب العقارب
حتى صمتي
يختنق فيني ويموت
واحاول اخرج من سكوتي
القى صوتي راح مني
صار غايب

[منتهى القريش]

ألتفت حولي
أدورني
ألاقيني وهم

أحاول أخفي كل مابي
من عذابي
يحتدم فيني الألم

[منتهى القريش]

من أشوفك
يصير الفرح بيا عصافير
تجي يمك .. تبوس همك
وفي سما روحي تحلق
ترسم الضحكه مشاوير

[منتهى القريش]

ويش تبين؟
ويتساقط من سؤالك .. احتمالك
ثم ينبت بي حنين

ما رجعت أبغى وصالك
موت الفكرة ببالك
جيت استرجع معك
ذكريات المُتعبين

[منتهى القريش]

جيت أخونك
وي عيونك
وابدل الشك ابـ يقين

ما أبي إلا عبيرك
يمرني لو مر غيرك
جيت أهديك اتزاني
في المحبة
وادري انك ما تحبه
أدري فيني
كان يغريك الجنون

[منتهى القريش]

البارحه
كان الأرق
يسولف مع رمشي وعيني

كنت أسهرك
لين احترق
ليلي بـ ليلي
وانطفت شمعة حنيني

مريت والذكرى
غرق
حسرة تحنتها ايديني

لا الموعد المنسي
صدق
ولا ادموع هجرك نسوني

طيفك .. حروفي
والورق ..
جريمه
والشاهد جنوني