البحيرة والنورس

[حمد الدوسري]

ليس في الوجود من يستحق أن أهبه فرحة الشماتة بهزيمتي

[حمد الدوسري]

من الرماد،ألملم روحي
وأحاول أن أتقمص ذاتي من جديد
لأعيش من جديد

[حمد الدوسري]

كذبت على وزعمت أننى عاصمة قلبك..
و اكتشفت أننى ضاحية مهملة من ضواحيه

[حمد الدوسري]

وداعاً ياغريب.. و وداعاً يا أنا
فلينفجر القلب بلحظة ذل:
تعال أنني اكره كل ما فيك

[حمد الدوسري]

من عز نومي صحيت وشفت في عيني
دمع تهادى على جفني وأنا غافي
سترت دمعي بكمي قبل يغريني
وأخذت هذا الجسد من باقي لحافي
وسريت تايه ورا خطوات رجليني
لا الوجه وجهي ولا أوصافي هي أوصافي
أمشي وأقول لطريقي لا توديني
لعيون ناس تبي تدري عن الخافي
أمانتك.. خلها ما بينك وبيني
خابرك يالدرب خوة عمر وسنافي
ما ودي الناس تدري وش يبكيني
كرامة النفس ورث أبوي وأسلافي
أمشي وأحس الخناجر في شراييني
والبرد يمشي وراي وينهش اطرافي

[حمد الدوسري]

اكتب واسلّي خاطري ب(الكتابه)
كود التهي في نظم الابيات وانساه
واثر القصايد منه قامت تشابه
من وين اقلّب دفتر اوجاعي القاه
هذي قصيده قلتها في عتابه
وهذي قصيده قلتها يوم فرقاه
وذيك القصيده قالها من عذابه
يكتب قصيدٍ منكسر بس مااحلاه
ويقول: (( جابه كان تقدر تجابه))
واقول شعرك لعن ابو من تحداه
ويروح يضحك ما اقتنع في الاجابه
ويقول: (( شعرك زين بطّل محاباه))
واقول: ((طبعا زين لأنك زهابه
لاصرت روح البيت وش لون تبغاه))؟
واليوم ذاك الوقت جمّع شبابه
واقفي ولاادري صاحبي وين وداه؟
رضيت مدري ذل ولا مهابه
ابعد واهلّ الدمع لأيام ذكراه
الشعر والليل وبياض السحابه
والضحك والحظ الردي والمعاناه

[حمد الدوسري]

ناس بلوني بالحسد والمشاريه
مافيهم اللي وسط قلبه مخافه
لا والمصيبه ويش أنا منحسد فيه ؟!
في الشعر , ودروب السهر , والكلافه !!
قولوا لذاك اللي ( سهادي ) على ايديه
وش جاه مني ؟! لعنبوها ضعافه
ان كان حاسدني على الشعر والتيه !
يجي يبادلني وأخط أعترافه :
يعطيني راحة باله اللي تقدّيه
وأيامه اللي ماتعرف الصلافه
ونذر علي لأعطيه وأعطيه وأعطيه
حتى يملّ من الشعر والصحافه

[حمد الدوسري]

ذاك ياما شلت زلاته وياما
قلت: عادي حتى لو يخطي عليه
صاحب وحقه على مثلي الاما
ضاقت ايدينه فزعت له بيديه
كانت جروحي من طعونه تداما
وكنت أحمل نفسي حمولٍ قويه
لين شفت العمر قدامه ترامى
وصد عني مانشدني ويش فيه؟
يحسبني باتجاهل واتعاما
مادرى اني حافظٍ ذيك الوصيه
يوم ابوي يقول والعالم نياما
ساعةٍ فيها المواجع سرمديه
ياعيالي حتى لو صرتوا يتاما
المعزه تورث النفس الغنيه